ڤیدیۆ.. وهسیهتنامهی ئهبومههدی موههندیس بڵاوكرایهوه
حهشد بڵاویكردهوه
K24 – ههولێر:
كهمێك پێش ئێستا سهرۆكایهتی دهستهی حهشدی شهعبی، گرتهی ڤیدیۆیی دهقی وهسیهتنامهی ئهبومههدی موههندیس، جێگری سهرۆكی دهستهی حهشدی شهعبی بڵاوكردهوه.
له گرته ڤیدیۆكهدا، موههندیس، پهیامێك ئاراستهی لایهنگرانی و كهسوكارو خێزانهكهی دهكات.
ههروهها دهڵێت: ئهركی ئێمه بهرهنگاربوونهوهی تیرۆر و گهندهڵییه و كار بۆ چاكسازی و نههێشتنی ستهم دهكهین.
بهرهبهیانی ئهمڕۆ، جێگری فهرماندهی حهشدی شهعبی، ئهبو مههدی موههندیس و فهرماندهی سوپای قودسی سوپای پاسداران، قاسم سولهیمانی له ئاكامی بۆردومانی فڕۆكهكانی ئهمهریكا له نزیك فڕۆكهخانهی بهغدا كوژران.
وێستگهكانی ژیانی ئهبومههدی موههندیس
- ناوی جهمال جهعفهر محهمهد عهلی ئال ئیبراهیمه. ناسراوه به ئهبومههدی موههندیس و له ئێران پێی دهوترێت جهمال ئیبراهیمی و خاوهنی 19 نازناوه.
- له ساڵی 1954 له بهسره لهدایكبووه. هاوسهرهكهی ئێرانییه.
- له 1973 زانكۆی تهكنۆلۆجی، بهشی ئهندازیاری مهدهنی خوێندووه و له 1977 زانكۆی تهواو كردووه.
- له سهرهتای ژیانی ماوهیهك له كوهیت و له ناوچهی جابریه ژیاوه.
- دوای تهواوكردنی خوێندن وهك ئهندازیار كاریكردووه و دواتر دكتۆرای له ئهندازیاری خوێندووه.
- روویكردووهته حهوزهی مهزههبی و لای موحسین حهكیم له بهسره خوێندوویهتی.
- له قۆناغی ناوهندییهوه پهیوهندی به حزبی دهعوهی ئیسلامییهوه كردووه.
- له دوای سهركهوتنی شۆڕشی ئیسلامی ئێران چهند جارێك رووبهڕووی دهستگیركردن و راوهدوونان بووهتهوه.
- دوای كوژرانی محهمهد باقر سهدر، ناچار بووه رووبكاته ئێران و له 1980 عێراقی بهجێهێشتووه.
- له 1985 بووهته ئهندامی ئهنجوومهنی باڵای ئیسلامی عێراق.
- وهك سیاسی و سهربازی له فهیلهقی بهدر كاری كردووه و دواتر بووهته فهرماندهی فهیلهقهكه تا دوای مانگێك له رووخانی بهعس له عێراق فهرمانده بووه و دواتر وازی له ئهنجوومهنی باڵای ئیسلامی و فهیلهقی بهدر هێناوه.
- له 2003 به دواوه روویكردووهته كاری سیاسی و رۆڵی سهرهكی ههبووه له درووستكردنی هاوپهیمانییهكانی شیعهدا.
- دوای دامهزراندنی حهشدی شهعبی رۆڵێكی سهرهكی گێڕاوه و بووهته یهكێك له فهرماندهكانی.
- تۆمهتبار كراوه به هێرشكردنه سهر باڵیۆزخانهكانی فهرهنسا و ئهمهریكا له كوهیت له ساڵی 1983 و له ساڵی 1984 له لایهن دادگای كوهیتهوه سزای لهسێدارهدانی بۆ دهركراوه.
- ههواڵگری كوهیت تۆمهتباری كردووه به ههوڵدان بۆ رفاندنی فڕۆكهیهكی هێڵی ئاسمانی كوهیت و ههوڵدان بۆ كوشتنی میری كوهیت له 1985دا.
- له دوای كهوتنی مووسڵ و سهرههڵدانی داعش، رۆڵێكی سهرهكی گێڕاوه له رێكخستنی حهشدی شهعبی و ئامادهكردنی بۆ رووبهڕووبوونهوهی داعش.
- له 27ی ئۆكتۆبهری 2017دا، هێزهر ناوێرت، گوتهبێژی وهزارهتی دهرهوهی ئهمهریكا، له بارهی ئهبومههدی موههندیس گوتی: ئهبومههدی موههندیس تیرۆریسته.
ناوبراو جهختیكردهوه، كه موههندیس له ساڵی 2009دا خراوهته ناو لیستی تیرۆری ئهمریكاوه.