دوو ھاووڵاتی گەرمیان بە 80 ھەزار دۆلار ئازاد كران

K24 - گەرمیان

دوو ھاووڵاتی دانیشتووی دەڤەری گەرمیان، دوای شەش مانگ رفاندنیان لەلایەن گرووپێكەوە بە 80 ھەزار دۆلار ئازاد كران.

ھەرێم جاف، پەیامنێری كوردستان24 لە گەرمیان رایگەیاند: "شەوی رابردوو ئەو دوو كەسە گەیشتوونەتەوە ناو كەسوكاریان".

یەكێك لە رفێندراوان بە ناوی وەلید فەرھاد، دوای رزگار بوونی لە دەست ئەو گرووپە بۆ كوردستان24 دەدوێت و دەڵێ: "لەناو كونێكدا زیندانیان كردین و ئاگاداری ھیچ نەبووین، ئەو گرووپە ھیچ قسەشیان لەگەڵ نەدەكردین، تەنھا پێیان دەگوتین نوێژ بكەن".

باوكی وەلید بە كوردستان24ی گوت: "زۆر ھەوڵماندا بۆ ئازاد كردنیان، دوای شەش مانگ بە 80 ھەزار دۆلار ئازاد كران".

دەشڵێت: "دەگوترێت كە ئەو گرووپە داعشن، بەڵام ئێمە نازانین ئەوە راستە یان نا".

ھ.م