شاندی دانوستکاری حکومەتی هەرێم و پەرلەمان کۆدەبنەوە

K24 – هه‌ولێر:

سبه‌ی شاندی دانوستانکاری حکومەتی هەرێمی کوردستان و پەرلەمان کۆده‌بنەوە و مافه‌ ده‌ستووری و شایسته‌ داراییه‌كان تاوتوێ ده‌كرێن.

لە کۆبوونەوەکە، شاندی دانوستانکاری حکومەتی هەرێمی کوردستان ئەنجامی گفتوگۆی چەند رۆژەیان لەگەڵ حکومەتی عێراقی فیدراڵ دەبەنە پەرلەمانی کوردستان و لەگەڵ سەرۆکایەتی پەرلەمان و سەرۆک فراکسیۆنەکان كۆدەبنەوە.

مونا قاوەچی، سکرتێری پەرلەمانی کوردستان بە کوردستان24ـی راگەیاند، پەرلەمان هەماهەنگ دەبێت لەگەڵ حکومەت بۆ چارەسەری کێشەکانی نێوان هەولێر و بەغدا.

راشیگەیاند، لەگەڵ شاندەکە لەبارەی شایستە داراییەکانی هەرێم قسەدەکەین و بەرچاوڕوونیمان دەبێت.

هەماهەنگی نێوان پەرلەمان و حکومەت لەم کابینەیە بەهێزە و بەردەوامیشە؛ ئەمەش لای زۆربەی فراکسیۆنەکان بە ھەنگاوێكی گرنگ دادەندرێت.

جیا لەوە، پەرلەمانی کوردستان پاڵپشتی هەوڵەکانی حکومەتی هەرێمی کوردستانە بۆ چارەسەری کێشەکان و لەگەڵ پەرلەمانی عێراقیش لە هەماهەنگیدان.