سەرۆك بارزانی سەرەخۆشی لە خانەوادەی مامۆستا مەلا رەسووڵ محەمەد سیوەیلی دەکات

K24 – هه‌ولێر:

سەرۆک مەسعود بارزانی بەبۆنەی کۆچی دوایی مەلا رەسوڵ محەمەد سیوەیلی، پەیامێکی سەرەخۆشی ئاراستەی خانەوادەی مەلا رەسوڵ کرد.

لە پەیامەکەی سەرۆک بارزانی هاتووە: "به‌داخ و په‌ژاره‌یه‌كی زۆره‌وه‌ هه‌واڵی كۆچی دوایی مامۆستا مەلا ڕەسووڵ مەلا محەمەد نادر سیوەیلی، وتاربێژی پێشووی مزگەوتی عەلی کەمال لە سلێمانی و کەسایەتیی بەهەڵوێست و ناوداری ئایینی و کۆمەڵایەتیمان پێگه‌یشت".

هاوخەمی خۆشی دەربڕیووە و لە پەیامەکە ئاماژەی بەوە کردووە: " سه‌ره‌خۆشی له‌ خانەوادە تێکۆشەرەکەتان و تەواوی خزم و ئاشنایانتان دەكەین و خۆمان بە ھاوبەشی خەمتان دەزانین".

مەلا رەسوڵ لەبنەماڵەیەکی نیشتیمانپەروەر لە ساڵی 1957 لەدایک بووە. لەکۆتایی حەفتاکانەوە وەک مامۆستایەکی ئاینی لەخزمەت شۆڕشی کورد و بزووتنەوەی رزگاریخوازی کوردا بووە.

 هەروەها، لەراپەرینی ساڵی 1991، رۆڵی کاریگەری لە ھاندان و جۆش و خرۆشی خەڵکی کوردستان ھەبووە.

دوا پۆستی مەلا رەسووڵ، راوێژکاری وەزارەتی ئەوقاف و کاروباری ئاینی بووە، کە تاوەکو کۆچکردنی، ئەو پۆستەی هەبووە.

دەقی پەیامەکەی سەرۆک بارزانی:

بەناوی خودای مەزن و دلۆڤان

خانەوادەی بەڕێزی مامۆستا مەلا ڕەسووڵ مەلا محەمەد نادر سیوەیلی

به‌داخ و په‌ژاره‌یه‌كی زۆره‌وه‌ هه‌واڵی كۆچی دوایی مامۆستا مەلا ڕەسووڵ مەلا محەمەد نادر سیوەیلی، وتاربێژی پێشووی مزگەوتی عەلی کەمال لە سلێمانی و کەسایەتیی بەهەڵوێست و ناوداری ئایینی و کۆمەڵایەتیمان پێگه‌یشت.

 سه‌ره‌خۆشی له‌ خانەوادە تێکۆشەرەکەتان و تەواوی خزم و ئاشنایانتان دەكەین و خۆمان بە ھاوبەشی خەمتان دەزانین.

‌لە‌ خوای گه‌وره‌ داواکارین گیانی مامۆستای کۆچکردوو بخاتە بەر ڕەحمەتی خۆی و ئۆقرەیی و ئارامییش بەھەموولایەك ببه‌خشێت .

انا للە وانا الیە راجعون

مسعود بارزانی

25ـی4ـی2020