زانیاری لەبارەی تووشبووەكەی كەمپی حەسەن شام ئاشكرا دەكرێت

K24 - ھەولێر

بەڕێوبەری کەمپی حەسەن شام، ئاشكرای دەكات ئەو كەسەی لە كەمپەكە تووشی كۆرۆنا بووە، ھەفتەی رابردوو لە كەمپەكە چووەتە دەرەوە و نەگەڕاوەتەوە ناو كەمپەكە.

رەشید دەروێش بەڕێوبەری کەمپی حەسەن شام بە کوردستانی 24 راگەیاند: "ئەو کەسەی لە کەمپی حەسەن شام  تووشی ڤایرۆسی کۆرۆنا بووە  لە 17  ئەم مانگەوە  لە کەمپ دەرچووە  و نەگەڕاوەتەوە  کەمپەکە، هەموو کەسوكاری نزیک و هاوڕێکانی سامپڵیان لێوەرگیراوە  بۆ دڵنیابوونەوە".

گوتیشی: "ماوەی دوو مانگ و نیوە کەمپەکان داخراون  و هاتوچۆ سنوردار کراوە".

دوێنێ یەكێك لە ئاوارەكانی كەمپی حەسەن شام وەك ھەڵگری ڤایرۆسی كۆرۆنا دەستنیشان كرا، بەپێی زانیارییەكانی پەیامنێری كوردستان24، ئەو كەسە چوار رۆژ لە كەمپ دەرچووە و سەردانی مووسڵی كردووە لەوێ تووشی كۆرۆنا بووە.

بەگوێرەی دوایین ئاماری وەزارەتی تەندروستی تائێستا 502 كەس لە ھەرێمی كوردستان تووشی كۆرۆنا بوونە. لەنێویاندا 5 حاڵەتی مردن ھەیە و 403 كەسیش چاكبوونەتەوە، ئێستا 94 نەخۆش لەژێر چاودێری پزیشكیدان.