کەشناسی: سبەینێ شەپۆلێکی بارانبارین هەرێمی کوردستان دەگرێتەوە

بەشی پێشبینی لە بەڕێوەبەرایەتیی گشتیی کەشناسیی و بوومەلەرزەزانی سەر بە وەزارەتی گواستنەوە و گەیاندن، ڕایگەیاند، سبەینێ شەپۆلیکی بارانبارین هەرێمی کوردستان دەگرێتەوە، هاوکات پلەکانی گەرما بە نزیکەی چوار پلە نزم دەبنەوە.

یەکشەممە 10ـی تشرینی دووەمی 2024، بەشی پێشبینی لە بەڕێوەبەرایەتیی گشتیی کەشناسیی و بوومەلەرزەزانی سەر بە وەزارەتی گواستنەوە و گەیاندنی حکوومەتی هەرێمی کوردستان، پێشبینی کەشوهەوای سبەینێی بڵاو کردەوە و ڕایگەیاند، سەرەتا لە سنووری پارێزگاکانی سلێمانی، هەڵەبجە و کەرکووک بارانبارین دەست پێدەکات، دواتر بارانەکە سەرجەم ناوچە جیاجیاکانی هەرێم دەگرێتەوە.

بە پێی ڕاگەیەندراوەکە، بارانبارینەکەی سبەینێ بە شێوەی نمەباران دەبێت و هەندێک کات ئەگەری لێزمەباران و هەورەتریشقە دەبێت، هەروەها پلەکانی گەرماش نزیکەی 4 پلە نزم دەبنەوە.

کەشناسیی ئاماژەی بەوە دا، خێرایی با سبەینێ مام ناوەند دەبێت (15 -25کم/ک) لە هەندێک کات چالاکتر دەبێت بۆ سەرووی 25کم/ک. هاوکات مەودای بینین لە نێوان 7 – 9 کم دەبێت.

بەرزترین پلەکانی گەرمای پێشبینیکراو بە پلەی سیلیزی :

هەولێر: 23

سلێمانی: 19

دهۆک: 22

کەرکووک: 23

هەڵەبجە: 19

زاخۆ : 21

حاجی ئۆمەران: 8 

سۆران: 18

گەرمیان: 23