قەیرانی کارەبا لە ئێران سەر هەڵدەدات

قەیرانی کارەبا لە ئێران سەر هەڵدەدات و کۆمپانیای نیشتمانیی دابەشکردنی کارەبا ڕایدەگەیەنێت: قەیرانەکە بەهۆی دابین نەکردنی سووتەمەنییە.

کۆمپانیای نیشتمانیی دابەشکردنی کارەبای ئێران رایگەیاندووە، بە هۆی دابین نەکردنی سووتەمەنیی پێویست بۆ وێستگەکانی بەرهەمهێنانی کارەبا، لەئەمڕۆوە ڕۆژانە لانیکەم دوو کاتژمێر کارەبا لەسەر هاووڵاتیان دەبڕدرێت. ئەمەش پاش ئەوە هات کە سەرۆککۆماری ئەم وڵاتە، بە هۆکاری تەندروستی، بەکارهێنانی مازۆت بۆ بەرهەمهێنانی کارەبای قەدەغە کرد.

لەگەڵ دابەزینی پلەکانی گەرما و زۆربوونی بەکارهێنانی سووتەمەنی و کارەبا لە ئێران، ڕۆژانە چەند کاتژمێرێک کارەبا لەسەر هاووڵاتیان دەبڕدرێت.

ڕاگەیاندنەکانی ئێران یەکشەممە ڕایانگەیاند: لەمڕۆوە لە سەرجەم شار و گوندەکانی ئێران، ڕۆژانە دوو کاتژمێر کارەبا لەسەر هاووڵاتیان دەبڕدرێت، کاتی بڕانەکەش لە مەودای نێوان 9ی بەیانی تا پێنجی پاش نیوەڕۆ دەبێت، هۆکاری پچڕانی کارەباش، دابین نەکردنی سووتەمەنیی پێویست بۆ وێستگەکانی بەرهەمهێنانی کارەبایە.

کۆمپانیای نیشتمانیی دابەشکرانی کارەبای ئێران رایگەیاندووە ،هاووڵاتیان دەتوانن بۆ ئاگاداربوون لە خشتەی بڕانی کارەبا سەردانی ماڵپەڕی ئەم کۆمپانیایە بکە،. ئەم کۆمپانیایەپچڕانی کارەبای گەڕاندووەتەوە بۆ بەرزبوونەوەی ئاستی بەکارهێنانی گاز لە کەرتی نشتەجێبوون و کەمبوونەوەی گازی وێستگەکانی بەرهەمهێنانی کارەبا.

 پێشتر وێستگەکانی کارەبا لە وەها دۆخێکدا بۆ بەردەوامبوونی کارەکانیان پەنایان دەبردە بەر سووتاندنی مازۆت بەڵام ئەمساڵ، مەسعوود پزیشکیانی سەرۆک کۆمار، بۆ ڕێگری لە پیسبوونی هەوا، سووتاندنی مازۆت لە وێستگەکانی بەرهەمهێنانی کارەبای قەدەغە کردووە، ئەمەش بووەتە هۆی کەمبوونەوەی بەرهەمهێنانی کارەبا لەم وێستگانە.

فاتمە موهاجیرانی، گوتەبێژی حکوومەتی ئێران بە ئاماژەکردن بە بڕیارەکەی پزیشکیان ڕایگەیاندووە، دەتوانین پچڕانی کارەبا بۆ ماوەیەکی کەم، بکەینە جێگرەوەی بەرهەمهێنانی ژەهر لە وێستگەکانی کارەبا.

بەڵام ئاژانسی فارس نیوزی سەر بە سوپای پاسداران، ئەم هەنگاوەی حکوومەتی بە کردەوەیەکی نمایشی ناو بردووە بۆ ئەوەی حکوومەت لە ئێستاوە پاساوی بۆ پچڕانی کارەبا لە وەرزی زستاندا هەبێت.