سەرۆک بارزانی: كریستیانەكان بەشێكی گرنگی وڵاتن

سەرۆک بارزانی لە پێشوازیی شاندێكی هاوبەشی هەردوو ژووری بازرگانیی كلدانی، ئەمەریكی و ئاشووری دووپاتی کردەوە،  خوشك و برا كریستیانەكان بەشێكی گرنگی وڵاتن و پاڵپشتیی خۆشی بۆ داواكانی خوشك و برایانی كریستیان لە پارێزگای نەینەوا و سەرانسەری عێراق دووپات كردەوە ، لە بەرامبەردا شاندی هاوبەشی هەردوو ژووری بازرگانیی كلدانی، ئەمەریكی و ئاشووری پێزانینیان بۆ ڕۆڵی سەرۆك بارزانی لە پارێزگاریكردن لە پێكهاتەكان و قووڵتركردنی پێكەوەژیان لە هەرێمی كوردستان دووپات کردەوە.

دووشەممە 24ی شوباتی 2025 لە سەلاحەددین سەرۆك مەسعود بارزانی پێشوازی لە شاندێكی هاوبەشی هەردوو ژووری بازرگانیی كلدانی، ئەمەریكی و ئاشووری، ئەمەریكی بە سەرۆكایەتیی مارتن مەننا سەرۆكی ژووری بازرگانیی كلدانی، ئەمەریكی كرد. 

لە دیدارەكەدا شاندی میوان پێزانینیان بۆ ڕۆڵی سەرۆك بارزانی لە پارێزگاریكردن لە پێكهاتەكان و قووڵتركردنی پێكەوەژیان لە هەرێمی كوردستان هەبوو، هەروەها سوپاسی سەرۆك بارزانییان كرد كە هەردەم جەختی لەوە كردووەتەوە كریستیانەكان لە وڵاتی خۆیان بمێننەوە و كۆچ نەكەن، هاوکات داواشیان كرد سەرۆك بارزانی پشتیوانی داواكاریی و مافی كریستیانەكان لە دەشتی نەینەوا بێت. 

هەر لەو دیدارەدا سەرۆك بارزانی سوپاسی سەردانی شاندی میوانی كرد بۆ هەرێمی كوردستان و جەختی لەوە كردەوە، خوشك و برا كریستیانەكان بەشێكی گرنگی وڵاتن و پاڵپشتیی خۆشی بۆ داواكانی خوشك و برایانی كریستیان لە پارێزگای نەینەوا و سەرانسەری عێراق دووپات كردەوە.