زیاتر لە 45 ملیار دینار بۆ پارێزگاکانی سلێمانی و هەڵەبجە و ئیدارەی گەرمیان و ڕاپەڕین خەرج دەکرێت

وەزارەتی دارایی و ئابووریی هەرێمی کوردستان زیاتر لە 45 ملیار دینار بۆ پارێزگاكانی سلێمانی و هەڵەبجە و ئیدارە سەربەخۆکانی گەرمیان و ڕاپەڕین، خەرج دەکات.

چوارشەممە، 30ـی نیسانی 2025، وەزارەتی دارایی و ئابووری ڕاگەیەندراوێکی بڵاو کردەوە تێیدا هاتووە "لە چەند ڕۆژی ڕابردوودا،بەمەبەستی بەدواداچوون بۆ کێشە و گرفتەکانی سنووری پارێزگاکانی سلێمانی و هەڵەبجە و ئیدارەی گەرمیان و ڕاپەڕین، ئاوات شێخ جەناب وەزیری دارایی و ئابووری سەرپەرشتیی چەند کۆبوونەوەیەکی کرد لەگەڵ بەرپرسانی ئیداری و یەکێتیی بەڵێندەران و بانکەکانی سەر بەوەزارەت، دوای ئەو کۆبوونەوانە و ئاگاداربوون لە کێشە و گرفتەکان، وەزیری دارایی و ئابووری چەند بڕیارێکی لەبەرژەوەندیی بەڵێندەران و ئەو کۆمپانیایانە دەرکرد کە سەرقاڵی جێبەجێکردنی پڕۆژەکانن."

ئاماژە بەوەش کراوە "وەزیری دارایی بڕیاری دا بە خەرجکردنی زیاتر لە 45 ملیار دینار بۆ دەرمان و پێداویستی تەندروستیی سلێمانی و نەخۆشخانەی هیوا و شەقامی 100مەتری سلێمانی و ڕێگای دووسایدی کەلار - دەربەندیخان و شایستەی کۆمپانیاکانی خۆڵ و خاشاک و پڕۆژە بەردەوامەکانی پارێزگاکانی سلێمانی و هەڵەبجە و ئیدارە سەربەخۆکانی گەرمیان و ڕاپەڕین.

 هەروا وەزیری دارایی و ئابووری بڕیاری دا بەبەردەوام بوونی لیژنەی خەرجکردنی گەڕانەوەی ( التأمینات و خطاب الضمان )ی بەڵێندەران لەسەرجەم بانکەکاندا، بەمەبەستی گەڕانەوەی پابەندییەکان بە پێی ڕێژە و گوژمەی دیاریکراو.

 

 
 
 
Fly Erbil Advertisment