بەردەوام بوونی هێرشەکانی ئیسرائیل چوارچێوەی هەماهەنگی کۆ کردەوە

چوارچێوەی هەماهەنگیی شیعەکان لە عێراق دوای کۆبوونەوەیەکی بەپەلە، هەڵوێستێکی هاوبەشیان بۆ ئیدانەی هێرشەکانی ئیسرائیل بۆ سەر ئێران ڕاگەیاند و بەزاندنی ئاسمانی عێراق بە پیشێلی سەروەری وەسف دەکەن. 

بە ئامادەبوونی محەممەد شیاع سوودانی، سەرۆک وەزیرانی عێراق لایەنەکانی چوارچێوەی هەمانگیی لایەنە شیعەکان کۆبوونەوە، لە ڕاگەیەندراوێکیان بڵاو کردووەتەوە و تێیدا هاتووە: هێرشەکانی ئیسرائیل بۆ سەر ئێران دەستدرێژین و بەهۆیەوە ژمارەیەک لە سەرکردە و زانای ئەتۆمی کوژراون.

چوارچێوەی هەماهەنگی هێرشەکانی ئیسرائیل بۆ سەر ئێران ئیدانە دەکات و داواکارە کۆمەڵگەی نێودەوڵەتی، ئیسرائیل ناچار بە ڕاگرتنی هێرشەکان بکات.

لە بەشێکی دیکەی ڕاگەیەندراوەکە هاتووە، لایەنەکانی چوارچێوەی هەماهەنگیی کۆکن لەسەر ئەوەی بەزاندنی ئاسمانی عێراق، پێشێلکاریی سەروەرییە و نابێت ڕێگە بدرێت ئاسمانی عێراق لە دژی وڵاتانی دراوسێ  بەکار بهێنرێت.