نووسینگەی ناتانیاهۆ: سەرۆک وەزیران بە دۆخی بارمتەکان شۆک بووە
نووسینگەی سەرۆک وەزیرانی ئیسرائیل ڕایگەیاند، بنیامین ناتانیاهۆ، سەرۆک وەزیرانی ئیسرائیل، شۆک بووە بەو گرتە ڤیدیۆییەی حەماس و جیهادی ئیسلامیی کە دوو بارمتەی ئیسرائیلیان لە غەززە بڵاو کردووەتەوە.
لە ڕاگەیەندراوەکەی نووسینگەی سەرۆک وەزیرانی ئیسرائیل هاتووە؛ "سەرۆک وەزیران شۆک بووە لە بەرامبەر ئەو گرتەڤیدیۆیانەی لەلایەن حەماسەوە بڵاو کراونەتەوە و بە بنەماڵەکانی ڕاگەیاندوون کە هەوڵەکان بۆ گەڕاندنەوەی سەرجەم بارمتەکان بەردەوامە".
دوو گرتە ڤیدیۆیی کە لە ڕۆژی پێنجشەممەوە لەلایەن حەماس و جیهادی ئیسلامییەوە بڵاو کراونەتەوە و تێیدا ڕۆم براسلاڤسکی و ئێڤیاتار دەیڤد، دەردەکەون کە ماندوو و برسین و خەریکی هەڵکەندنی زەوین، ئەمەش ناڕەزایی بەرفراوانی ئیسرائیلی لێکەوتەوە و بووەتە هۆی ئەوەی داوای ڕێککەوتنێک بکرێت لە زووترین کاتدا بۆ ئازادکردنی بارمتەکان.
بەهۆی بڵاو کردنەوەی ئەو گرتە ڤیدیۆیەوە، ناڕەزایی و تووڕە بوونی ئیسرائیلییەکانی لێ کەوتەوە و هەزاران کەس لە گۆڕەپانی بارمتەکان لە تەلئەڤیڤ گردبوونەوە.
ئەو دوو بارمتەیە، لەنێو ئەو پەنجا بارمتەیەدان کە لە کەرتی غەززە دەست بەسەرن و گومان دەکرێت لانیکەم 20 کەسیان هێشتا لە ژیاندا مابن.
گرووپە چەکدارەکان، گرتە ڤیدیۆییەکانیان لە کاتێکدا بڵاوکردەوە کە دانوستانەکانی ئاگربەست ڕاگیراون و فەڵەستینییەکان ڕووبەڕووی قەیرانێکی برسییەتیی بەرفراوان بوونەتەوە.
لای خۆیەوە ڕۆژنامەی 'ئیسرائیل ئەلیەوم' ڕاستڕەو نووسیویەتی؛ "دڕندەیی حەماس هیچ سنوورێک ناناسێت"، هاوکات هائارێتزی چەپ دەڵێت؛ "ناتانیاهۆ هیچ پەلەیەکی نییە" بۆ ڕزگارکردنی بارمتەکان.