کۆمیسیۆن: دەمانەوێت پرۆسەی هەڵبژاردن بە شێوەیەکی دادپەروەرانە بەڕێوە بچێت

سەرۆکی کۆمیسیۆنی باڵای سەربەخۆی هەڵبژاردنەکانی عێراق، دەڵێت: هەوڵی سەرخستنی پرۆسەی هەڵبژاردن دەدەین. جەختی لەوەش کردەوە، پێویستە پارت و کاندیدەکان پابەندیی ڕێنماییەکانی کۆمیسیۆن بن.

شەممە 9ـی ئابی 2025، عومەر ئەحمەد، سەرۆکی کۆمیسیۆنی باڵای سەربەخۆی هەڵبژاردنەکانی عێراق، لە کۆنفرانسێکی ڕۆژنامەوانیدا، گوتی: دەمانەوێت پرۆسەی هەڵبژاردن بە شێوەیەکی دادپەروەرانە بەڕێوە بچێت، هەروەها بە یەک چاو سەیری هەموو لایەنە سیاسییەکان دەکەین.

سەرۆکی کۆمیسیۆن ئاماژەی بەوە کرد، لە وێستگەیەکی گرنگی پرۆسەی هەڵبژاردن دان. هەروەها دەڵێت: هەڵبژاردنێکی شەفاف بەرپرسیارییەتی هەمووانە.

عومەر ئەحمەد، داوا لە کاندید و هاوپەیمانێتییەکان دەکات پابەندیی ڕێنماییەکانی کۆمیسیۆن بن، بە تایبەت لە پرۆسەی بانگەشەدا.

هیواداریشە لایەنە سیاسییەکان، بە شێوەیەکی دیموکراتییانە ململانێی یەکتر بکەن و هەوڵ بۆ بەدەستهێنان دەنگ بدەن.

هەر ئەمڕۆ جومانە غەلای، گوتەبێژی کۆمیسیۆنی باڵای هەڵبژاردنەکانی عێراق، بە کوردستان24ـی گوت: هیچ نییەتێک بۆ دواخستنی هەڵبژاردن نییە، هەروەها ئامادەکارییەکان بە شێوەیەکی باش بەڕێوە دەچن، بۆ ئەوەی لە ڕۆژی دیاریکراویی خۆیدا کە 11ـی تشرینی دووەمی ئەم ساڵە، هەڵبژاردن بەڕێوە بچێت.