مەسرور بارزانی: ئێزگەی دەنگی کوردستان مێژوویەکی پڕ لە سەروەری هەیە
مەسرور بارزانی ساڵیادی دامەزراندنی ئێزگەی دەنگی کوردستان پیرۆز دەکات و دەڵێت "مێژوویەکی پڕ لە سەروەری و شانازی لە کاروانی ڕاگەیاندنی کوردستاندا هەیە."
ئەمڕۆ یەکشەممە، 28ـی ئەیلوولی 2025، مەسرور بارزانی، جێگری سەرۆکی پارتی دیموکراتی کوردستان، پەیامێکی پیرۆزبایی گەرمی ئاراستەی بەڕێوەبەر و کارمەندانی ئێزگەی دەنگی کوردستان کرد بە بۆنەی (62)ـەمین ساڵیادی دامەزراندنییەوە.
بە گوتەی مەسرور بارزانی "ئێزگەی دەنگی کوردستان، مێژوویەکی پڕ لە سەروەری و شانازی لە کاروانی ڕاگەیاندنی کوردستاندا هەیە و وەک ئیزگەیەکی دێرین و دەنگی شۆڕش و داستان و نەبەردییەکانی پێشمەرگەی کوردستان، خاوەنی پێگەیەکی سەنگین و ڕێزلێگیراوە."
جێگری سەرۆکی پارتی دەستخۆشی لە تەواوی کارمەندانی ئێزگەکە دەکات و هیوادارە هەمیشە لە پێشکەوتنی بەردەوام و پێشەنگیدا بن لە پێناو گەیاندنی ڕاستییەکان و پەرەپێدانی هزری نیشتمانپەروەریی و بەرگریکردن لە مافەکانی گەلی کوردستان.
