عەلی جاف داوا لە هاوولاتییان دەکات خۆیان لە هاککەرەکان بپارێزن
تاوانەكانی ساختەكاری، بەتایبەت دەستدرێژیی سێكسی لە رێی ئامێرە ئەلیكترۆنییەكانەوە زۆر بووە، خەڵكیش بەهۆی داونەریتی كۆمەڵایەتی و نەریتی خێڵەكییەوە، ئامادە نین سكاڵا تۆمار بكەن.
لە لێدوانێكیدا بۆ ماڵپەڕی کوردستان24، عەلی جاف شارەزای ئاسایشی زانیاریی لە كوردستان، ئامۆژگاری ئەو قوربانیانە دەكات كە بەركەوتەی پەیجە ئەلیكترۆنییەكانن و دەڵێت: ئاگاداری هەندێك پەیج بن كە هەلی كار ڕادەگەیەنن، ئەوانە زۆربەیان ئامانجی فریودانی داراییان هەیە، نابێت ئەم پەیجانە متمانەیان پێ بكرێت و بەڵگەنامەی فەرمی یان وێنەی كەسی پێشكەشیان بكرێت، جگە لەوكاتەی پشتڕاستی ناونیشان یان بارەگای فەرمی پەیجەكە دەكەنەوە.
عەلی جاف دەڵێت: لەگەڵ هەر كێشەیەكیش لەگەڵ ئەو پەیج و تۆڕە كۆمەڵایەتییانەدا، با هاووڵاتییان پەنا ببەنەبەر نزیكترین بنكەی پۆلیس یان بەڕێوەبەرایەتیی پۆلیسی كۆمەڵگەكەیان، لە ئەگەری بەركەوتنی هەڕەشە و زەوتكردن دەبێت سكاڵا تۆمار بكەن، چونكە تاوانەكانی ساختەكاری، بەتایبەت دەستدرێژیی سێكسی لە رێی ئامێرە ئەلیكترۆنییەكانەوە زۆر بووە، خەڵكیش بەهۆی داونەریتی كۆمەڵایەتی و نەریتی خێڵەكییەوە، ئامادە نین سكاڵا تۆمار بكەن.
ئەو شارەزایەی ئاسایشی زانیاری پێی وایە، زۆربەی مامەڵە داراییەكان لە ڕێی تۆڕەكانی كۆمەڵایەتی و ئەلیكترۆنییەكانەوە، كارێكی نادروستە، چونكە هیچ دڵنیاییەكی یاسایی نییە، بۆیە پێویستە هاووڵاتییان لەگەڵ كەسانی نەناسراو قسە نەكەن و لینكی نەناسراو نەكەنەوە، لەوانەیە هاككەر بن و وێنەت زەوت بكەن و هەڕەشەت بكەنە سەر.
گوتیشی: لە هەموو حاڵێكدا دوای هەر كێشەیەكی كۆمەڵایەتی لەناو تۆڕەكانی ئینتەرنێتدا، هاووڵاتییان دەبێـت راستەوخۆ بەشی پۆلیسی سەربە وەزارەتی ناوخۆ ئاگادار بكەنەوە تا بەشێوەیەكی یاسایی كێشەكە چارەسەر بكرێت، چونكە پۆلیس دەستی بە كەسەكە دەگات و بەڵێننامەی نووسراو وەردەگرێت و بە نهێنی وێنە و ڤیدیۆ كلیپەكان دەسڕێتەوە بەبێ ئاگاداری خێزانی قوربانییەكە، پاش ئەوەش ئەركی پۆلیسە چاودێری پەیجە ساختەكان و جادووگەرەكان بكات، چونكە ڕێپێنەگرتنیان كێشەكان زۆرتر دەكەن.
