بە ئامادەبوونی مەسرور بارزانی رێوڕەسمی رۆژی ئاڵای کوردستان لە ھەولێر بەڕێوەدەچێت

K24 - ھەولێر

ئەمڕۆ بە ئامادەبوونی سەرۆکی حکومەتی هەرێمی کوردستان رێوڕەسمی رۆژی ئاڵای کوردستان لە ھەولێر بەڕێوەدەچێت.

بە گوێرەی فەرمانگەی میدیای و زانیاری حكومەتی ھەرێمی كوردستان، ئەمڕۆ پێنجشەممە 2020/12/17  کاتژمێر 9:30 بە ئامادەبوونی مەسرور بارزانی سەرۆکی حکومەتی هەرێمی کوردستان ، رێوڕەسمی رۆژی ئاڵای کوردستان لە فەرماندەیی زێرەڤانیی لە شاری هەولێر بەڕێوەدەچێت .

رۆژی ئاڵای کوردستان، ساڵانە لە 17ی كانوونی یەكەم لە ھەرێمی كوردستان وەك بۆنەیەكی نەتەوەی رێوڕەسمی تایبەت لە دامەزراوە فەرمییەكان و شوێنە گشتییەكان رێكدەخرێن.

لە ساڵی 2009 دا پەرلەمانی كوردستان رۆژی 17ی مانگی 12ی وەک رۆژی‌ ئاڵای‌ كوردستان دیاریكرد.

 لە سەردەمی جەنگی دووەمی جیهانی و لەگەڵ بەرەوپێشچوونی بزووتنەوەی کورد لە ئێران و پاشانیش راگەیاندن و دامەزراندنی کۆماری کوردستان، لە رۆژی 22/1/1946 کە شاری مەهاباد پایتەختی بوو، ئاڵای سەربەخۆیی کوردستان هەڵکرا.