وەزارەتی ناوخۆ وشەی 'کەمینە'ـی گۆڕی بۆ 'پێکهاتەکانی کوردستان'

هێمن میرانی، بەڕێوەبەری گشتی دیوانی وەزارەتی ناوخۆی حکوومەتی هەرێمی کوردستان، لە کۆنفرانسێکی رۆژنامەوانیدا ئامادەکردنی درافتی کۆتایی ستراتیژییەکی نیشتمانی بۆ پاراستنی پێکەوەژیان و بەرەنگاربوونەوەی توندڕەوی ئاشکرا کرد. ئەم ستراتیژییە بە هاوکاری رێکخراوە نێودەوڵەتییەکانی وەک IOM و Spark و Sparda ئامادە کراوە و بڕیارە لە ئاییندەیەکی نزیکدا بخرێتە بەردەم ئەنجوومەنی وەزیران بۆ پەسەندکردن.

کۆتاییهێنان بە چەمکی "کەمینە"
هێمن میرانی جەختی کردەوە، یەکێک لە ئامانجە سەرەکییەکانی ئەم ستراتیژییە، پاراستنی فەرهەنگی پێکەوەژیان و یەکتر قبوڵکردنە لە کوردستان، ئاماژەی بەوەش کرد، لەمەودوا وشەی "کەمینە" بەکارنایەت و هەموو گرووپە ئایینی و نەتەوەییەکان بە "پێکهاتەکانی کوردستان" ناودەبرێن، چونکە هەمووان لە ماف و ئەرکدا یەکسانن.

بەرەنگاربوونەوەی توندڕەوی
بەڕێوەبەری گشتی دیوانی وەزارەتی ناوخۆ رایگەیاند، رووبەڕووبوونەوەی توندڕەوی تەنیا بە یاسا نابێت، بەڵکو پێویستی بە گۆڕینی "بیر" هەیە، بۆ ئەم مەبەستەش ستراتیژییەکە سێکتەرەکانی پەروەردە، زانکۆکان، میدیا و رێکخراوەکانی کۆمەڵگەی مەدەنی دەگرێتەوە، دەڵێت، ناوەندێکی تایبەت بۆ مۆنیتەرکردنی میدیاکان دروست دەکرێت بۆ ئەوەی رێگری لە بڵاوکردنەوەی هەر گوتارێکی توندڕەوی بکرێت.

مژدەیەک بۆ شۆفێران و زانیاری لەبارەی دامەزراندن
لە بەشێکی دیکەی کۆنفرانسەکەدا، هێمن میرانی چەند زانیارییەکی گرنگی خستە ڕوو و رایگەیاند، بڕیاری لێخۆشبوونی 20% لە سزاکانی هاتووچۆ بۆ هاووڵاتیان درێژ کرایەوە و حکوومەت پاڵپشتی ئەم پێشنیازە دەکات.

سەبارەت بە دامەزراندنی 665 کەس وەک پۆلیسی گەشتیاری، روونیکردەوە، بەهۆی بڕیارێکی ساڵی 2024 بۆ راگرتنی دامەزراندن، پرۆسەکە وەستاوە و چاوەڕێی بڕیاری نوێی ئەنجوومەنی وەزیران دەکەن بۆ تەواوکردنی کارەکانیان.

ئەم هەنگاوەی وەزارەتی ناوخۆ لە چوارچێوەی بەرنامەی کابینەی 9ـی حکوومەتی هەرێمی کوردستانە بۆ چاکسازی و پاراستنی ئاشتیی کۆمەڵایەتی لە وڵاتدا.