کەشناسی: ئەمشەو نمەباران دەبێت
بەڕێوەبەرایەتی گشتیی کەشناسی هەرێمی کوردستان پێشبینی دەکات ئەمڕۆ و سبەی ئاسمانی هەرێم لە پەڵە و نیمچە هەورەوە بۆ هەوری تەواو بگۆڕێت و ئەگەری نمە باران سەرجەم ناوچەکانی هەرێمی کوردستان بگرێتەوە.
بەڕێوەبەرایەتییەکە کەشى پێشبینیکراوى 48 کاتژمێرى داهاتووی بڵاوکردووەتەوە و بۆ کەشی ئەمڕۆ سێشەممە17ـی شوباتی 2026، پێشبینی دەکات، ئاسمان ساماڵ و پەڵە هەور بێت، بەڵام لە کاتەکانی ئێوارەدا بۆ هەوری تەواو دەگۆڕێت.
هەر بە گوێرەی پێشبینییەکان، ئەمشەو لە سنووری ئیدارەی زاخۆ نمەباران و بارانی مامناوەند دەسپێدەکات و پاشان کاریگەرییەکەی بۆ سەرجەم ناوچەکانی پارێزگای دهۆک، ناوچە شاخاوییەکانی ئیدارەی راپەڕین، ناوچە شاخاوییەکانی هەولێر و سەنتەری شار و پارێزگای سلێمانی درێژ دەبێتەوە، کاریگەرییەکە تاوەکوو بەرە بەیانی سبەی چوارشەممە بەشێوەی نمەباران لە باشووری هەرێم و ناوچەکانی گەرمیان بەردەوام دەبێت.
لەبارەی کەشی پێشبینیکراوی سبەى چوارشەممە 18ـی شوباتی 2026، بەڕێوەبەرایەتییەکە ئاماژەیداوە، ئاسمان نیمچە هەور و هەوری تەواو دەبێت، لەگەڵ نمە بارانی پچڕ پچڕ لە بەشێک لە ناوچە شاخاوییەکان و ناوچە سنووریەکان، بەڵام ئەگەری نمە بارانێکی کەم لە سەنتەری پارێزگای سلێمانی و هەولێر لە کاتەکانی بەیانی زوودا پێشبینیکراوە، بەڵام دوای نیوەڕۆ ئاسمان بۆ پەڵە هەور و نیمچە هەور دەگۆڕێت .
بەرزترین پلەکانی گەرمای پێشبینیکراو :
| شارەکان | سێشەممە - پلەی سیلیزی | چوارشەممە - پلەی سیلیزی |
| هەولێر | 23 | 24 |
| پیرمام | 20 | 20 |
| سۆران | 19 | 19 |
| حاجی ئۆمەران | 16 | 16 |
| سلێمانی | 22 | 22 |
| چەمچەماڵ | 24 | 24 |
| دهۆک | 21 | 20 |
| زاخۆ | 21 | 20 |
| هەڵەبجە | 22 | 22 |
| گەرمیان | 27 | 28 |