سندوقی دراوی نێودەوڵەتی: ململانێکانی رۆژهەڵاتی ناوەڕاست هەڕەشە لە گەشەی ئابووریی جیهانی دەکەن
کریستالینا جۆرجیڤا، بەڕێوەبەری گشتیی سندوقی دراوی نێودەوڵەتی (IMF)، هۆشدارییەکی توند سەبارەت بە لێکەوتە ئابوورییەکانی ململانێکانی رۆژهەڵاتی ناوەڕاست دەدات و رایدەگەیەنێت؛ ئەم دۆخە تاقیکردنەوەیەکی نوێ و سەختە بۆ خۆڕاگری ئابووریی جیهانی.
ئەمڕۆ دووشەممە، 9ـی ئاداری 2026، کریستالینا جۆرجیڤا لە لێدوانێکدا بۆ راگەیاندنەکان ئاماژەی بەوە کرد، بەردەوامبوونی قەیرانەکان لە ناوچەی رۆژهەڵاتی ناوەڕاست دەبێتە هۆی تێکدانی جوڵەی بازاڕ و کاریگەری نەرێنی راستەوخۆی لەسەر رێژەی گەشەکردنی جیهانی و بەرزبوونەوەی ئاستی هەڵاوسان دەبێت.
سەبارەت بە نرخی وزە، بەڕێوەبەری سندوقەکە روونی کردەوە: "هەر بەرزبوونەوەیەکی نرخی نەوت بە رێژەی 10%، ئەگەر بۆ ماوەی ساڵێک بەردەوام بێت، دەبێتە هۆی بەرزبوونەوەی هەڵاوسانی جیهانی بە بڕی 0.4%، 40 خاڵ."
جۆرجیڤا داوای لە داڕێژەرانی سیاسەتی دارایی و ئابووریی لە سەرانسەری جیهان کرد، چاوکراوە بن و خۆیان بۆ سیناریۆ پێشبینینەکراوەکان ئامادە بکەن، چونکە کەشوهەوای ئابووریی و جیۆپۆلەتیکی ئێستا لەبار نییە و ئەگەری گۆڕانکاری کتوپڕی تێدایە.
ئەم هۆشدارییانەی سندوقی دراوی نێودەوڵەتی لە کاتێکدایە کە بازاڕە جیهانییەکان بە وردی چاودێری پەرەسەندنە سەربازی و سیاسییەکانی ناوچەکە دەکەن، کە کاریگەری ڕاستەوخۆیان لەسەر رێڕەوی بازرگانی و نرخی وزە هەیە.