ئەنتۆنیۆ گۆتێرێس ئامادەیی خۆی دەربڕی بۆ 5 ساڵی دیکە لە پۆستەكەیدا بمێنێتەوە

K24 – ھەولێر:

ئەنتۆنیۆ گۆتێرێس ئامادەیی خۆی دەربڕی بۆ 5 ساڵی دیکە لە پۆستی سکرتێری گشتی نەتەوەیەکگرتوەکاندا بمێنێتەوە.

ستێفان دوجاریک، گوتەبێژی سکرتێری گشتی نەتەوەیەکگرتوەکان رایگەیاند، گۆتێرێس بە ئەندامانی کۆمەڵەی گشتی و ئەنجوومەنی ئاسایشی نێودەوڵەتی راگەیاندووە، کە ئامادەیە بۆ 5 ساڵی دیکە لە پۆستی سکرتێری گشتی نەتەوەیەکگرتووەکاندا بمێنێتەوە.

رۆژی ھەینی، گۆتێرێس 71 ساڵ بە ئەندامانی ھەمیشەیی ئەنجوومەنی ئاسایشی گوتووە دەتوانێت لە 2022 تا 2026 لە پۆستەکەیدا بەردەوام بێت. بەریتانیاش پێشوازی و پیرۆزبایی لێدەکات.

چەند بەرپرسێکی نزیک لە گۆتێرێس ئاشکرای دەکەن، سکرتێری گشتی گوتویەتی: ئەگەر ترەمپ ببێتەوە سەرۆکی ئەمەریکا ئامادە نییە لە پۆستی سکرتێری گشتی نەتەوەیەکگرتووەکاندا بەردەوام بێت.

سکرتێری گشتی نەتەوەیەکگرتوەکان بۆیان ھەیە بۆ دوو خول و بۆ ماوەی 10 ساڵ لە پۆستەکەیاندا بمێننەوە، ئەمەش بە ھەماھەنگی لەگەڵ 5 وڵاتە ھەمیشەییەکەی ئەنجوومەنی ئاسایشی نێودەوڵەتی.