ئەمریکا: پووتین لە پرسی ئۆکرانیادا دۆستی ئێمە نییە
بەڕێوەبەری هەواڵگریی نیشتمانیی ئەمریکا رایگەیاند، ڤلادیمیر پووتین، سەرۆکی رووسیا لە پەیوەند بە پرسی ئۆکرانیاوە دۆستی ئەمریکا نییە. ئەو لێدوانە چەند رۆژێک دوای ئەوە دێت، دۆناڵد ترەمپ، سەرۆکی ئەمریکا بە ئەرێنی باسی سەرۆکی رووسیای کرد و بە دۆستی خۆی ناوی برد.
یەکشەممە 22ـی تشرینی دووەمی 2026، جەی کڵایتۆن، بەڕێوەبەری هەواڵگریی نیشتمانیی ئەمریکا لە چاوپێکەوتنێکدا لەگەڵ تۆڕی "ئەی بی سی نیوز" گوتی: "پووتین هەرگیز لە ئۆکرانیا دۆستی ئەمریکا نییە".
سەبارەت بە هۆکاری بەکارهێنانی دەستەواژەی دۆست لەلایەن ترەمپەوە، کڵایتۆن جەختیکردەوە ئەو دەستەواژەیە لە چوارچێوەی گفتوگۆکانی نێوان سەرکردەی سێ زلهێزی ئەتۆمیی جیهان، واتە ئەمریکا و رووسیا و چین، "بە تەواوی گونجاو" بووە. ئەو سێ سەرکردەیە هەفتەی رابردوو لە لووتکەیەکدا لە چین کۆبوونەوە.
پێنجشەممەی رابردوو، ترەمپ بەرگری لە بەکارهێنانی ئەو دەستەواژەیە کرد و گوتی: "باشە ئەگەر ئەو کەسانەی خاوەنی 4000 چەکی ئەتۆمین دۆست بن نەک دوژمن". هەینیی رابردوو کە جارێکی دیکە پرسیاری لێکرا، ترەمپ رەتیکردەوە ئاشکرایبکات، ئایا پووتین بە گشتی دۆستی ئەمریکایە یان نا، تەنیا ئەوەندەی گوت کە ناتوانێت بە نوێنەرایەتیی ئەمریکا قسە بکات.
ئەم وەسفەی ترەمپ کاردانەوەی هاوپەیمانە ئەورووپییەکانی ئۆکرانیای لێکەوتەوە. دۆناڵد تووسک، سەرۆکوەزیرانی پۆڵەندا لەو بارەیەوە رایگەیاند: "پووتین دۆستی ئێمە نییە و هەرگیزیش نابێت". هاوکات، ڤلۆدیمیر زێلێنسکی، سەرۆکی ئۆکرانیا پێنجشەممە وەڵامی پرسیارێکی سەبارەت بە لێدوانەکانی ترەمپ نەدایەوە و بەردەوامیی بە کارەکانی دا.
رووسیا ساڵی 2022 هێرشی فراوانی بۆ سەر ئۆکرانیا دەستپێکرد و ئێستا نزیکەی یەک لەسەر پێنجی خاکی ئەو وڵاتەی کۆنترۆڵ کردووە. پووتین تا ئێستا هیچ رایگەیاندووە، دەستهەڵگرتن لە داواکارییەکەی نیشان نەداوە، کە بریتییە لەوەی کیێڤ لە بەرامبەر ئاشتیدا، تەواوی ناوچەی دۆنباسی رۆژهەڵات رادەست بکات.