ئەمریکا پاداشتێکی 10 ملیۆن دۆلاری لە عێراق راگەیاند

باڵیۆزخانەی ئەمریکا لە بەغدا پاداشتێکی 10 ملیۆن دۆلاری بەرانبەر بە پێدانی زانیاریی لەسەر سەرکردەیەکی حزبوڵڵای عێراقی راگەیاند و وێنەی سەرکردەکەی حزبوڵڵاشی بڵاوکردووەتەوە.

باڵیۆزخانەی ئەمریکا لە بەغدا ئەمڕۆ سێشەممە 14ی نیسانی 2026، لەبارەی خەڵاتە داراییەکەوە، وردەکارییەکانی بڵاوکردووەتەوە و ئاماژەیداوە، پاداشتەکەی دیاریانکردووە بەرانبەر بە پێدانی زانیاریی لەسەر ئەحمەد حەمیداوی، سەرکردەی کەتیبەکانی حزبوڵڵای عێراق، بڕەکەی دەگاتە 10 ملیۆن دۆلاری ئەمریکی.

هەر لە راگەیەندراوەکەدا هاتووە "کەتیبەکانی حزبوڵڵا گرووپێکی تیرۆریستیی سەر بە ئێرانە لە عێراق و بەرپرسیارە لە هێرشکردنە سەر دامەزراوە دیپلۆماسییەکانی ئەمریکا و رفاندنی هاووڵاتیانی ئەمریکی و کوشتنی هاووڵاتیانی مەدەنی بێتاوانی عێراقی"

باڵیۆزخانەی ئەمریکا ئاماژەیداوە"هەر کەسێک زانیاریی لەسەر ئەحمەد حەمیداوی هەیە، دەتوانێت لە رێگەی هێڵی پێدانی زانیاریی پارێزراو لە وێبگەڕی تۆر  (Tor)، یان بە نامە لە رێگەی بەرنامەی سیگناڵ  (Signal)ـەوە، زانیارییەکان بنێرێت".

هەرەوها جەخت دەکاتەوە "دەکرێت زانیارییەکان بتکەنە شایستەی گواستنەوەی شوێنی نیشتەجێبوونت و وەرگرتنی پاداشت".

کەتیبەکانی حزبوڵڵای عێراق (كتائب حزب الله) گرووپێکی چەکداری شیعەی عێراقە و لە ساڵی 2003 دوای جەنگی ئازادی عێراق دژ بە هێز و بەرژەوەندییەکانی ئەمریکا دامەزراوە، یەکێکە گرووپە میلیشیاکانی سەر بە بەرەی مقاوەمە و ژمارەیان چەکدارەکانی بە نزیکەی 30 هەزار مەزەندە دەکرێت، باوەڕیان بە ئایدۆلۆژیای ویلایەتی فەقیھ هەیە. 

حزبوڵڵا بەشێک لە پێکهاتەی هێزەکانی حەشدی شەعبی و لە چوارچێوەی لیواکانی 45، 46، 47 خراونەتە نێو سیستەمی بەرگریی سەربازی عێراق، بەڵام سەربەخۆیی فەرماندەیی خۆیان هەیە.

لە 23 ساڵی رابردوودا دەیان جار هێرشی درۆنیان کردووەتە سەر باڵیۆزخانەی ئەمریکا لە بەغدا و کونسولخانەی ئەمریکا لە هەولێر و بنکە و بەرژەوەندییەکانی ئەمریکا لە عێراق و سووریا و ناوچەکە هەیە.

لە تشرینی دووەمی 2025دا، کازم فەرتوسی، گوتەبێژی ئەو گرووپە میلیشیایە لە تۆڕی کۆمەڵایەتی "ئێکس" لە پۆستێکدا هەڕەشەی شەڕی وزەی لە جیهان کرد و رایگەیاند "ئەگەر شەڕی وزە هەڵگیرسێت، جیهان بێبەش دەکەین لە 12 ملیۆن بەرمیل نەوتی رۆژانە کە لە کەنەداوەوە هەناردەی بازاڕەکان دەکرێت".

ئەم هەڕەشەیەی حزبوڵلای عێراقی لە کاتێکدا بوو، کە دەنگۆی ئەگەری هێرشکردنە سەر دامەزراوە نەوتییەکانی ئێران لەلایەن ئیسرائیلەوە بڵاو کرابووەوە.

هەروەها لە لە ماوەی جەنگی 40 رۆژەی ئەمریکا و ئیسرائیل دژ بە ئێران، حزبوڵڵای عێراق جیا لەوەی دەیان هێرشی درۆنی کردە سەر باڵیۆزخانەی ئەمریکا لە بەغدا، هێرشی درۆنیان کردە سەر بارەگایەکی هەواڵگری عێراق بەهۆیەوە ئەفسەرێکی کوردی خەڵکی شاری کەرکووک کوژرا.

دوای ئەو هێرشە، حزبوڵڵا لە 23ی مانگی رابردوودا، وێڕای ئەوەی بەرپرسیارێتی هێرشەکەی گرتە ئەستۆ، هەڕەشەی کوشتنی لە ئەفسەرە کورد و عەرەبە سوننەکانی هەواڵگریی عێراق کرد.