سەرۆکی کۆڵۆمبیا داوای هاوکاریی لە ئەمریکا دەکات

ئەبێلاردۆ دی لا ئێسپرییا، سەرۆکی کۆڵۆمبیا، بڕیاری دا هێزەکانی سوپا لە ناوچەکانی رۆژئاوای وڵات بڵاوەپێبکات، ئەوەش دوای ئەوەی زنجیرەیەک ئاگرکەوتنەوەی گەورە روویان لە ناوچەکە کردووە و سەرۆک بە ئەنقەست و دەستکرد وەسفی کردن.

دی لا ئێسپرییا سەرۆکی کۆڵۆمبیا ئاشکرای کرد، ئاگرەکە زیاتر لە 20 هەزار هێکتار لە دارستان و زەوییە کشتوکاڵییەکانی لەناوبردووە، بەتایبەتی لە ناوچەی تۆلیما. 

ئاماژەی بەوەش کرد، وڵاتەکەی داوای هاوکاریی بەپەلەی لە هەریەکە لە چیلی و ئەمریکا کردووە بۆ کۆنترۆڵکردنی دۆخەکە.

دی لا ئێسپرییا لە رێگەی هەژماری خۆی لە سۆشیاڵ میدیای ئێکس رایگەیاند: "گومان هەیە کەسانێک بە ماتۆڕسکیل و بە بەکارهێنانی ماددەی سووتێنەر ئەم ئاگرانەیان کردبێتەوە." هەروەها جەختی کردەوە،  هێزە ئەمنییەکان راسپێردراون بۆ دۆزینەوە و دەستگیرکردنی ئەنجامدەرانی ئەم کارە.

لە لایەکی دیکەوە، ئادریانە ماگالی ماتیزی، پارێزگاری تۆلیما رایگەیاند؛ سوپا بە شێوەیەکی کردەیی دەستی بە رووبەڕووبوونەوەی قەیرانەکە کردووە.

بەگوێرەی زانیارییەکانی حکوومەت، لە کۆتایی هەفتەی رابردوودا 24 شوێنی ئاگرکەوتنەوەی هاوکات تۆمارکراون، ئەمەش لە کاتێکدایە وڵاتەکە بەهۆی دیاردەی ئێل نینۆوە رووبەڕووی وشکەساڵییەکی توند و بەرزبوونەوەی پلەکانی گەرما بووەتەوە.

بەگوێرەی ڕاپۆرتە سەرەتاییەکان، ئاگرەکە زیانێکی گەورەی بە بەرهەمە کشتوکاڵییەکان گەیاندووە، بەتایبەتی لیمۆ، قاوە و مانگۆ. ئەم کارەساتە ژینگەییە لە کاتێکدایە کۆڵۆمبیا هێشتا لە ژێر کاریگەرییەکانی بومەلەرزە بەهێزەکەی 10ی ئابی رابردوودایە، کە بووە هۆی گیانلەدەستدانی زیاتر لە 300 کەس لە رۆژئاوای وڵاتەکە، ئەمەش ئەرکی حکوومەتی لە رووبەڕووبوونەوەی کارەساتە سروشتییەکان قورستر کردووە.