سووریا بڕیاری فەرمی لە بارەی خوێندنی زمانی کوردی لە قوتابخانەکان دەردەکات

وەزارەتی پەروەردەی سووریا، بە بڕیارێکی فەرمی، خوێندنی زمانی کوردی وەک زمانێکی نیشتمانی لە قوتابخانە حکوومی و تایبەتەکانی ئەو ناوچانەی رێژەیەکی بەرچاو لە هاووڵاتییانی کوردی تێدا نیشتەجێیە، پەسند کرد.

پێنجشەممە، 27ـی ئابی 2026، محەمەد عەبدولڕەحمان ترکۆ، وەزیری پەروەردەی سووریا، بڕیاری فەرمیی ژمارە 2068/ 943ـی دەرکرد، کە تێیدا رێکارەکانی خوێندنی زمانی کوردی لە قوتابخانە حکوومی و تایبەتەکانی وڵاتدا رێکدەخرێت. 

بە پێی نووسراوی وەزارەتەکە، ئەم بڕیارە وەک هەنگاوێک بۆ پاراستنی مافە کولتووری، زمانەوانییەکان و بەهێزکردنی یەکڕیزیی نیشتمانی و ناسنامەی شارستانیی سووریایە.

بڕیارەکە کە لە چوارچێوەی هەموارکردنەوەی رێنماییە جێبەجێکارییەکانی پەیوەست بە مەرسومی ژمارە 13ـی ساڵی 2026 دەرچووە، کە چەند خاڵێکی سەرەکی لەخۆ دەگرێت:

یەکەم: لە رووی پرۆگرامی خوێندنەوە

-خوێندنی زمانی کوردی، وەک زمانێکی نیشتمانی لە قوتابخانە حکوومی و تایبەتەکانی ئەو ناوچانەی کە رێژەیەکی بەرچاو لە هاووڵاتییانی کوردی تێدا نیشتەجێن، دەستەبەر دەکرێت.

-خوێندنی ئەم زمانە لە سەرجەم قۆناخەکانی خوێندندا دەبێت و وەک بەشێکی سەرەکی لە پڕۆگرامی پەسندکراو هەژمار دەکرێت.

 پڕۆگرامی خوێندنی زمانی کوردی بەم شێوازە دابەش دەبێت

وانەی زمانی کوردی: بە تێکڕای سێ بەشەوانە لە هەفتەیەکدا دەخوێندرێت، قوتابی لە پاڵ زمانەکانی عەرەبی و ئینگلیزیدا دەیخوێنێت و نمرەکەی لە کۆی گشتیی نمرەکانی کۆتایی ساڵدا بە گوێرەی رێسا فەرمییەکان تۆمار دەکرێت.

وانەی چالاکییەکان: بە تێکڕای یەک بەشەوانە لە هەفتەیەکدا دەبێت. بۆ ئاسانکاری لە قۆناخی گواستنەوەدا، لە یەکەم ساڵی جێبەجێکردنی ئەم بڕیارەدا، ماف بە قوتابییان دەدرێت کە لە نێوان خوێندنی وانەکانی (کۆمەڵایەتی، مێژوو، جوگرافیا و فەلسەفە) بە زمانی عەرەبی یان زمانی کوردی، یەکێکیان هەڵبژێرن.

ناوەندی نیشتمانی بۆ پەرەپێدانی مەنهەجەکان راسپێردراوە بە ئامادەکردنی پرۆگرامە کوردییەکان بۆ سەرجەم قۆناخەکانی خوێندن بە پێی بنەما زانستی و پەروەردەییە فەرمییەکان.

دووەم: لە رووی کادیری پەروەردەیی و مامۆستایانەوە

وەزارەتی پەروەردە بەڕێوەبەرایەتییەکانی پەروەردە و سەرپەرشتیاریی پەروەردەیی راسپاردووە بۆ دابینکردنی کادیری پێویست لە ناوەوە یان دەرەوەی میلاکی فەرمی، بەو مەرجەی کاندیدەکان ئەم خاڵانەیان تێدا بێت:

-هەڵگرانی بڕوانامەی زانکۆ یان بڕوانامەی پەیمانگای پێگەیاندنی مامۆستایان بن و شارەزایی تەواویان لە زمانی کوردیدا هەبێت.

-لە کاتی پێویستدا، دەکرێت هەڵگرانی بڕوانامەی ئامادەیی گشتی کە زمانی کوردی دەزانن، بەپێی پێویستیی راستەقینە دابمەزرێن.

-بۆ دڵنیابوون لە لێهاتوویی مامۆستایان، تاقیکردنەوەی نووسینەکی و زارەکی لە لایەن بەڕێوەبەرایەتیی سەرپەرشتیاریی پەروەردەییەوە بە هەماهەنگی لەگەڵ ناوەندی نیشتمانی بۆ پەرەپێدانی پرۆگرامەکان بە پێی پێوەرە یەکگرتووەکان ئەنجام دەدرێت.

ئەم بڕیارە لە ئەمڕۆوە دەکەوێتە واری جێبەجێکردنەوە و ئاراستەی سەرجەم لایەنە پەیوەندیدارەکان کراوە بۆ کار پێکردنی.