ئاسایشی حەسەکە: تەرمی هاووڵاتییەک لە سەرێکانی دۆزرایەوە و ناسنامەی تۆمەتبارەکە دەستنیشانکرا

فەرماندەیی هێزەکانی ئاسایشی ناوخۆ لە پارێزگای حەسەکە رایگەیاند، دوای بەدواداچوونی چڕ بۆ دۆسیەی رفاندن و کوشتنی هاووڵاتییەک بە ناوی سامی شێخمووس حەسۆ ناسراو بە "سیپان"، تەرمەکەی دۆزراوەتەوە و ناسنامەی تۆمەتباری سەرەکیی رووداوەکەش ئاشکراکراوە.

هەینی 11ـی ئەیلوولی 2026، بەگوێرەی راگەیەندراوێکی فەرماندەیی ئاسایشی حەسەکە، لەسەر بنەمای زانیارییە هەواڵگرییەکان و گرتە ڤیدیۆییەکان کاتی رفاندنی ئەو هاووڵاتییەیان بەڵگەدار کردبوو، دەستبەجێ تیمەکانی بەڵگەی تاوان و ئەرکە تایبەتەکانی سەر بە بەڕێوەبەرایەتیی ئاسایشی سەرێکانی چوونەتە شوێنی رووداوەکە بۆ بۆ لێکۆڵینەوە و بەدواداچوونی پێویست.

ئاسایشی حەسەکە روونیکردەوە، دوای فراوانکردنی ئۆپەراسیۆنی گەڕان و پشکنینی مەیدانی، تەرمی حەسۆ لە نزیک گوندی حەلوو دۆزراوەتەوە، لە پشکنینە سەرەتاییەکانیشدا دەرکەوتووە کە بە چەندان فیشەک لە نزیکەوە تەقەی لێکراوە و لە شوێنی رووداوەکە گیانی لەدەستدا.

لە راگەیەندراوەکەدا هاتووە، لە رێگەی بەڵگە کۆکراوەکان و ئەنجامی لێکۆڵینەوە سەرەتاییەکانەوە، هێزە ئەمنییەکان توانیویانە ناسنامەی گومانلێکراوی سەرەکی بە ناوی (م. ع) دیاریبکەن، هاوکات تیمە پەیوەندیدارەکان لە ئۆپەراسیۆنێکی بەرفراواندا بەردەوامن لە گەڕان و بەدواداچوون بۆ دەستگیرکردنی تۆمەتبارەکە، تاوەکو دوای تەواوبوونی رێکارە یاساییەکان رادەستی دادگای تایبەتمەند بکرێت.