گشتی

لە ئیسپانیا بەهۆی پێکدادانی دوو شەمەندەفەر 50 کەس گیانیان لەدەستدا

جیهان هێڵی شەمەندەفەر ئیسپانیا قوربانی

لە ئەنجامی پێکدادانی دوو شەمەندەفەری خێرا لە نزیک تۆلیدۆ لە ناوەڕاستی ئیسپانیا، 50 کەس گیانیان لەدەستدا، 179 کەسی دیکەش بریندارە و بەرپرسانی خۆجێیی هۆشدارییان لەبارەی ئەگەری بەرزبوونەوەی ژمارەی قوربانییان دا.

ئەمڕۆ چوارشەممە، 28ـی تشرینی یەکەمی 2026، پێدرۆ سانشێز، سەرۆکوەزیرانی ئیسپانیا نیگەرانیی خۆی بەرامبەر بەم رووداوە دەربڕی. سانشێز رایگەیاند، تیمەکانی فریاگوزاری لە مەیدانەکەدان بۆ پێشکەشکردنی هاوکاری بە زیانلێکەوتووان و پشتیوانی و هاوسۆزیی خۆی بۆ قوربانییان و بنەماڵەکانیان دەردەبڕێت.

بەگوێرەی راگەیەندراوی بەرپرسانی خۆجێیی، پێکدادانەکە لە مەودای 150 کیلۆمەتر لە باشووری مەدرید روویداوە. گوتەبێژی دەسەڵاتدارانی هەرێمی کاستیا لا مانچا، کە رووداوەکەی تێدا روویدا، پشتڕاستیکردەوە 50 کەس گیانی لە دەستداوە و ئەگەری بەرزبوونەوەی ئەو ئامارە هەیە.

مانوێل گالان، سەرۆکی شارەوانیی ئۆردا، بە تەلەڤیزیۆنی فەرمیی ئیسپانیا تی ڤی ئی رایگەیاند، دوو شەمەندەفەر پێکدایانکردووە و ژمارەیەک بریندار هەن.

گوتەبێژێکی خزمەتگوزارییەکانی فریاگوزاریی ئیسپانیا بە ئاژانسی فرانس پرێس رایگەیاند، پێکدادانی شەمەندەفەرەکان سەر لە بەیانی بە کاتی ناوخۆ روویداوە. ئەو گوتەبێژە روونیکردەوە، هەموو سەرچاوەکان خراونەتە حاڵەتی ئامادەباشییەوە، لەوانەش چەند تیمی ئاگرکوژێنەوە، سێ هێلیکۆپتەر و دوو یەکەی گواستنەوەی فریاگوزاریی چڕ.

کۆمپانیای بەڕێوەبردنی ژێرخانی هێڵی ئاسنین، ئادێف، رووداوەکەی پشتڕاستکردەوە و لە پەیامێکدا لە تۆڕە کۆمەڵایەتییەکان رایگەیاند، هاتوچۆی شەمەندەفەرەکان لە هێڵی خێرای ئاسنیندا، کە مەدرید بە باشووری ئیسپانیا دەبەستێتەوە، راگیراوە.

ئەم رووداوە کەمتر لە ساڵێک دوای پێکدادانی دوو شەمەندەفەر لە شارۆچکەی ئاداموس لە باشووری ئیسپانیا دێت، کە لەو رووداوەدا 46 کەس گیانیان لەدەستدابوو. 

 
 
لاڤین عومەر ,