سەفین دزەیی: کوردستان24 توانیویەتی ماڵەکانی کوردستان رووناک بکاتەوە

بەرپرسی فەرمانگەی پەیوەندییەکانی دەرەوەی حکوومەتی هەرێمی کوردستان جەختی لەوە کردەوە، کوردستان24 لە ماوەی 11 ساڵی رابردوودا توانیویەتی ماڵەکانی کوردستان رووناک بکاتەوە؛ دەشڵێت: کەناڵەکە توانیویەتی متمانەیەکی پتەو لە نێوان شاشە و بینەردا دروست بکات.

شەممە، 31ـی تشرینی یەکەمی 2026، سەفین موحسین دزەیی، بەرپرسی فەرمانگەی پەیوەندییەکانی دەرەوەی حکوومەتی هەرێمی کوردستان، بە بۆنەی ساڵیادی دەستپێکردنی پەخشی کوردستان24، گوتی:
دەستخۆشی لە رۆڵی بەرچاوی کوردستان24 دەکەم و کەناڵەکە لە ماوەی 11 ساڵی رابردوودا توانیویەتی ماڵەکانی کوردستان رووناک بکاتەوە.

دزەیی روونیکردەوە، سەرکەوتنی ئەم دەزگایە تەنیا لە گواستنەوەی بە پەلەی هەواڵەکاندا نەبووە، بەڵکو لە رێگەی بەرهەمهێنانی زنجیرەیەک بەرنامەی جیاواز و دەستبردن بۆ ئەو پرسانەی بە شێوەیەکی راستەوخۆ جێگەی گرنگیدانی ژیانی رۆژانەی هاووڵاتییانن، توانیویەتی دەنگ و داخوازییەکانی خەڵک بکاتە سەنتەری کارەکانی خۆی و متمانەیەکی پتەو لە نێوان شاشە و بینەردا دروست بکات.

11 ساڵ لەمەوبەر، دامەزراوەی کوردستان24 بۆ توێژینەوە و راگەیاندن لە وێستگەیەکی مێژوویی و چارەنووسسازدا دەستی بە کارەکانی کرد و هاتە نێو گۆڕەپانی رۆژنامەگەریی کوردییەوە. ئەو کاتەی گەلی کوردستان و هێزی پێشمەرگە لە جەنگێکی سەختدا دژی داعش وەستابوونەوە، کوردستان24 چووە سەنگەری بەرگری و بووە قەڵغانی پاراستنی خاک، مرۆڤ و سامانی نیشتمانیی کوردستان.