ئایدن مەعروف: کار بۆ کردنەوەی قوتابخانەی سریانی لە سلێمانی دەکرێت

وەزیری هەرێم بۆ کاروباری پێکهاتەکان لە کاتی سەردانێکیدا بۆ پارێزگای سلێمانی، جەخت لە قووڵکردنەوەی پێکەوەژیانی ئایینی و نەتەوەیی دەکاتەوە و ئاشکرای دەکات، هەوڵ بۆ کردنەوەی قوتابخانەی تایبەت بە پێکهاتەی کریستیان (سریانی) لە شارەکە دەدرێت، هاوکات گرنگی زیاتر بە خوێندنی تورکمانی لە سلێمانی و کفری دەدرێت.

ئەمڕۆ سێشەممە، 03ـی تشرینی دووەمی 2026، ئایدن مەعروف، وەزیری هەرێم بۆ کاروباری پێکهاتەکان لە حکوومەتی هەرێمی کوردستان، سەردانی شاری سلێمانی کرد و لەگەڵ هەڤاڵ ئەبوبەکر، پارێزگاری سلێمانی و چین و توێژە جیاوازەکانی شارەکە کۆبووەوە.

 ئایدن مەعروف لە لێدوانێکی رۆژنامەوانیدا رایگەیاند: "مەبەست لە سەردانەکەمان لە نزیکەوە ئاگاداربوونە لە رەوشی پێکهاتەکان لە شاری سلێمانی. وەک هەمووان دەزانن سلێمانی شاری پێکەوەژیانی ئایین و نەتەوە جیاوازەکانە، ئەمەش بۆ ئێمە زۆر گرنگە و حکوومەتی هەرێمی کوردستانیش هەمیشە پشتیوانی لەم پێکەوەژیانە کردووە."

وەزیری پێکهاتەکان ئاماژەی بە رۆڵی کریستیانەکان (کلدان، سریان، ئاشووری) و تورکمانەکان کرد و گوتی: "پێکهاتەکان رۆڵێکی گرنگیان هەیە لە پرۆسەی سیاسی و کارگێڕی لە عێراق و هەرێمی کوردستان. لە سنووری سلێمانی و گەرمیان، بەتایبەتی لە قەزای کفری، پێکهاتەی تورکمان بوونیان هەیە و پێکەوەژیانێکی زۆر باشیان لەگەڵ برا کوردەکان و پێکهاتەکانی دیکە هەیە."

کەرتی پەروەردە و خوێندنی پێکهاتەکان تەوەرێکی سەرەکیی قسەکانی ئایدن مەعروف بوو، لەو بارەیەوە ئاشکرای کرد: "پێشنیاز کراوە کە قوتابخانەی سریانی بۆ پێکهاتەی کریستیان لە شاری سلێمانی بکرێتەوە، ئێمە زۆر گرنگی بەم بابەتە دەدەین و پشتیوانی دەکەین."

سەبارەت بە قوتابخانە تورکمانییەکانیش روونی کردەوە: "لە شاری سلێمانی یەک قوتابخانەی تورکمانی بە ناوی (قوتابخانەی بارش) هەیە، هەروەها لە قەزای کفری سێ قوتابخانەی تورکمانی هەن. پێویستە گرنگیی زیاتر بەم بوارە پەروەردەییە بدرێت بۆ ئەوەی کولتوور و زمانی پێکهاتەکان بپارێزرێت و گەشەی پێ بدرێت."

لە کۆتایی قسەکانیدا، ئایدن مەعروف باسی لەوە کرد کە لەم سەردانەدا بۆ سلێمانی، نوێنەرانی پێکهاتەی کریستیان لە پەرلەمانی کوردستان و نوێنەرانی تورکمان لە کفری یاوەری بوون. ئامانج لەمەش دروستکردنی هەماهەنگیی زیاترە لەگەڵ ئیدارەی سلێمانی و گەرمیان، بۆ ئەوەی پێکهاتەکان بتوانن لە رووی سیاسی و کارگێڕییەوە بەشدارییەکی کاراتریان لە بەڕێوەبردنی ناوچەکانیاندا هەبێت.