بەهۆی نەبوونی جێگرەوەوە ئەگەری گەڕانەوەی جێنسن هوانگ بۆ ئێنڤیدیا لە ئارادایە

بەهۆی نەبوونی جێگرەوەیەکی هەمیشەیی بۆ پۆستەکەی، ئەگەری گەڕانەوەی جێنسن هوانگ، هاوبەشی دامەزرێنەر و بەڕێوەبەری جێبەجێکاری دەستلەکارکێشاوەی کۆمپانیای ئێنڤیدیا بۆ سەر کارەکەی بەدوور نازانرێت، ئەمەش دوای ئەوەی هوانگ کە کۆمپانیایەکی بە بەهای 4 تریلیۆن دۆلار بنیات ناوە، دوای 33 ساڵ لە کارکردن، پێنجشەممەی رابردوو دەستلەکارکێشانەوەی خۆی لە پۆستەکەی و ئەندامێتیی دەستەی بەڕێوەبردن راگەیاند.

کۆمپانیای ئێنڤیدیا، کە چیپەکانی نزیکەی تەواوی شۆڕشی زیرەکیی دەستکرد لە جیهاندا بەڕێوە دەبەن، رایگەیاندبوو کە بڕیاری دەستلەکارکێشانەوەکەی هوانگ دەستبەجێ چووەتە بواری جێبەجێکردنەوە، بەبێ ئەوەی بە فەرمی هیچ هۆکارێک بۆ ئەو بڕیارە ئاشکرا بکات.

ئەم بڕیارە کەمتر لە هەفتەیەک دوای ئەوە هات کە هوانگ دانی بەوەدا نا پەیوەندییەکی دەرەوەی هاوسەرگیری لەگەڵ بەڕێوەبەرێکی بازرگانیدا هەبووە، کە هەواڵگریی ئەمریکا گومانی هەیە ئەو کەسە سیخوڕی چین بێت. دواتریش رۆژنامەی "نیویۆرک تایمز" بڵاوی کردەوە کە ناوبراو پەیوەندییەکی دیکەی لەگەڵ کارمەندێکی ئێنڤیدیادا هەبووە. لە بەرامبەردا، چین ئەو تۆمەتانە رەت دەکاتەوە و بە "بوختان" ناویان دەبات.

کۆلێت کرێس، بەڕێوەبەری دارایی ئێنڤیدیا، بە وەکالەت پۆستی بەڕێوەبەری جێبەجێکاری کۆمپانیاکە بەڕێوە دەبات تا ئەو کاتەی کۆمپانیاکە جێگرەوەیەکی هەمیشەیی بۆ ئەو پۆستە دەدۆزێتەوە.

راگەیاندنی دەستلەکارکێشانەوەکەی هوانگ کاریگەریی راستەوخۆی لەسەر بازاڕی دارایی "وۆڵ ستریت" دروست کرد و بووە هۆی دابەزینی بەهای پشکەکانی ئێنڤیدیا، لە کاتێکدا پشکەکانی کۆمپانیا رکابەرەکانی وەک (ئەی ئێم دی) بەرزبوونەوەیان تۆمار کرد.

هاوکات، هەواڵەکە کاردانەوەی باڵای لە واشنتن لێکەوتەوە؛ بەگوێرەی زانیارییەکان، دۆناڵد ترەمپ، سەرۆکی ئەمریکا پەیوەندیی بە هوانگەوە کردووە و داوای لێ کردووە بۆ مانەوە لە پۆستەکەیدا تێبکۆشێت، لە هەمان کاتدا یاسادانەران لە واشنتن هەوڵ دەدەن ئەو بەرپرسە بانگهێشتی دادگا بکەن بە مەبەستی شایەتیدان.

لە لایەکی دیکەوە، بەشێک لە ناودارترین کەسایەتییەکانی "سیلیکۆن ڤالی"، لە نێویاندا ئیلۆن مەسک، بەرگرییان لە هوانگ کردووە و وەک کەسایەتییەکی یەکلاکەرەوە بۆ پێشەنگایەتیی ئەمریکا لە بواری زیرەکیی دەستکرددا ناویان بردووە. تا ئێستا روون نییە ئایا ئەم پشتیوانییانە دەبنە هۆی گەڕانەوەی بۆ پۆستەکەی یان نا.

جێنسن هوانگ، کە بە پۆشینی چاکەتە چەرمە رەشەکەی ناسرابوو، پێشتر بە گوتە بەناوبانگەکەی رایگەیاندبوو کە نهێنیی بەردەوامیی ئەو لە پۆستی بەڕێوەبەری جێبەجێکاردا بریتییە لە: "لە کار دەرنەکرێیت و بێزار نەبیت"، بەڵام بەم دەستلەکارکێشانەوەیە سەردەمی چاکەتە چەرمەکەی هوانگ لە ئێنڤیدیا کۆتایی هات.