Li Merîwanê lîstikeke kevnar ji aliyê xortan ve tê vejandin
Ji ber qeyrana aborî û belavbûna vîrusa Koronayê, kêfxweşiyên xelkê kêm bûne, lê li devera Merîwan a Rojhilatê Kurdistanê, lîstikeke kevnar a Kurdewarî tê vejandin û rûyê xelkê dikenîne.
Hewlêr (K24) – Ji ber qeyrana aborî û belavbûna vîrusa Koronayê, kêfxweşiyên xelkê kêm bûne, lê li devereke Merîwanê ya Rojhilatê Kurdistanê, lîstikeke kevnar a Kurdewarî tê vejandin û rûyê xelkê dikenîne.
Lîstika Kose, lîstikeke qedîm e û destpêkê bi govendeke li malê dest pê dike. Piştre bi heman coş, diçin yek bi yek malên gund.
Hemû xortên beşdarî lîstikê dibin, divê simbêl û rih li ser rûyê xwe çêkin, rih û simbêlê du kesên herî pêş jî pir in û spî ne, ew her du kose, dibin pêşengên xortan û bi şev li gund digerin û daxwaza xelatê ji malan dikin û ew jî bi merc xelatan didin wan.
Mezin û biçûkên gund, bivê nevê dibin beşek ji lîstika Kose. Hemû mal bi mercê ku govendê bigrin, xelat didin koseyan. Êdî kêfxweşî li malekê dest pê dike û li seranserê gund digere.
Piştî ger û govendê, dor tê ser wê yekê biryarek li ser destkeftên wê şevê were dayîn, kose biryar didin ku tiştên hatine berhevkirin, ji malbatên hejar ên gund re werin belavkirin.