Amerîka: Girîng e hilbijartinên Parlamentoya Herêma Kurdistanê azade û dadperwerane bin

Navenda Nûçeyan (K24) – Amerîka tekeziyê li ser giringiya lidarxistina hilbijartinên Parlamentoya Herêma Kurdistanê bi awayekî azad û dadperwerane dike.

Konsulê giştî yê nû yê Amerîka li Hewlêrê Stephen Bittner roja 15ê Tebaxê bi awayekî cuda li gel Serok Barzanî, Serokê Herêma Kurdistanê Nêçîrvan Barzanî, Serokwezîr Mesrûr Barzanî, Cîgirê Serokwezîr Qubad Talebanî û Serokê Yekîtiya Niştimanî ya Kurdistanê (YNK) Bafil Talebanî re civiyabû.

Balyoza Amerîkayê li Iraqê Alina Romanowski li hejmara xwe ya tora civakî “X” peyamek derbarê hevdîtinên Stephen Bittner ligel berpirsên bilind ên Herêma Kurdistanê belav kir.

Li gor Romanowski, Bittner di hevdîtinên ligel berpirsên bilind ên Herêma Kurdistanê de tekezî li ser lidarxistina hilbijartinên azad û dadperwerane kiriye.

Biryar e hilbijartinên gera şeşem a Parlamentoya Kurdistanê dê 20-10-2024’an bi serperiştiya Komisyona Bilind a Serbixwe ya Hilbijartinan a Iraqê were lidarxistin.

Herwiha Balyozê Amerîkayê got jî: “Em pabend in ku ligel hevkarên xwe yên li Hikûmeta Herêma Kurdistanê kar ji bo baştirkirina aramî û asayîşa Iraqê bikin, bi rêya proseya demokratîk.”