Şandeke Wezareta Darayî ya Iraqê serdana Wezareta Darayî ya Herêma Kurdistanê kir

Navenda Nûçeyan (K24) - Şandeke Wezareta Darayî ya Hikûmeta Federal serdana Wezareta Darayî ya Hikûmeta Herêma Kurdistanê kir û pê re danûstandin li ser mijara jêbirîna mûçeyên fermanber û xanenişînên Herêma Kurdistanê bi rêjeya 3% kirin.

Ragihandina Wezareta Darayî û Aborî ya Hikûmeta Herêma Kurdistanê îro (Çarşem, 25.06.2025) ragihand ku, şandeke Hikûmeta Federal a Iraqê bi serokatiya Rêveberê Giştî yê Sindoqa Xanenişîniyê ya Iraqê Hayder Casim serdana Wezareta Darayî û Aborî ya Hikûmeta Herêma Kurdistanê kir.

Ragihandina Wezareta Darayî û Aborî herwesa got ku, armanca wê serdanê nîqaşkirina mijara jêbirîna bi rêjeya 3% ya mûçeyên fermanber û xanenişînên Herêma Kurdistanê bû, li gorî bicîhanîna qanûna xanenişîna Iraqê ya yekgirtî û li ser daxwaza Wezareta Darayî ya Iraqê ji 1/1/2014 heta 1/6/2025 dê bi awayê qistên mehane jê re bê vegerandin.

Ragihandina Wezareta Darayî û Aborî ya Hikûmeta Herêma Kurdistanê amaje jî da, “Di pareke din a wê civînê de, pirsa xanenişîniya hêzên Pêşmergeyan û çawaniya hesabkirina xizmet û mûçeyên wan di çarçoveya qanûna xanenişîniyê ya yekgirtî ya Iraqê de hatin nîqaşkirin.”

Wezareta Darayî û Aborî ya Herêma Kurdistanê pêştir li roja 13ê Gulana 2025ê bi awayekî fermî Serokê Desteya Xanenişîniya Niştîmanî û Rêveberê Giştî yê Sindoqa Xanenişîniyê ya Iraqê vexwandin, da ku bicivin û pirsgirêkên têkildarî xanenişîniyê li Herêma Kurdistanê nîqaş bikin.