پۆلیسی چین خێزانێک لە ماڵەکەی خۆیاندا بەند دەکەن

K24 – هه‌ولێر:

پۆلیسی چین لە هەرێمی جیانگسو، ژنێک و خێزانەکەی کە تووشبووی ڤایرۆسی کۆرۆنان، لە ماڵەکەی خۆیان بەند دەکەن.

پۆلیس ماڵی ژنەکە بە ئاسن پەرژین دەکەن و چەند هێمایەکی ئاگادارکردنەوەش لە ماڵەکەدا هەڵدواسن تاوەکو دراوسێکانیان، نزیک نەبنەوە لێیان.

بەگوێرەی هەواڵێکی دەیلی مەیل، ئەو خێزانە لە شاری ووهان کە سەرچاوەی دروستبوونی ڤایرۆسەکەیە گەڕاونەتەوە و پۆلیسیش بۆ ئەوەی نەیەنە دەرەوە، لە ماڵەکەی خۆیان بەندی کردوون.

گرتە ڤیدیۆی بەندکردنی ئەو خێزانە بڵاوبووەتەوە و تیایدا دەردەکەوێت، ژنێک هاوار دەکات.

تاوەکو ئێستا، نزیکەی 400 کەس لە چین، بەهۆی کۆرۆنا گیانیان لەدەستداوە.