دوایین زانیاری له باره‌ی ناوه‌ڕۆكی رێككه‌وتنی گۆڕان و یه‌كێتی
فه‌رید ئه‌سه‌سه‌رد له باره‌ی ناوه‌ڕۆكی رێككه‌وتنه‌كه بۆ كوردستان24 ده‌دوێت
K24 - هه‌ولێر:
ئه‌ندامێكی سه‌ركردایه‌تی یه‌كێتیی نیشتمانی كوردستان، له باره‌ی رێككه‌وتنی نێوان حزبه‌كه‌ی و بزووتنه‌وه‌ی گۆڕان رایگه‌یاند، له ئێستا ناوه‌ڕۆكی رێككه‌وتنه‌كه له‌به‌ر ده‌ستی سه‌ركردایه‌تی هه‌ردوولایه.
فه‌رید ئه‌سه‌سه‌رد، ئه‌ندامی سه‌ركردایه‌تی یه‌كێتی له باره‌ی راگه‌یاندنی رێككه‌وتنه‌كه گوتی: "دیار نییه كه‌ی راده‌گه‌یه‌نرێت، به‌ڵام هه‌ندێك له ورده‌كارییه‌كان ماوه".
له باره‌ی ناوه‌ڕۆكی رێككه‌وتنه‌كه‌وه، ئه‌سه‌سه‌رد گوتی: "ئه‌م دوولایه‌نه هه‌ست به‌وه ده‌كه‌ن، په‌یوه‌ندییه‌كانییان له چوارچێوه‌ی دۆكیومێنتێكی نووسراوه‌وه رێكبخه‌نه‌وه و هه‌ماهه‌نگییه‌كی زۆرتر له چوارچێوه‌ی سیاسه‌تی گشتی خۆیان له‌هه‌موو پرسه‌كان دروست بكه‌ن".
هه‌روه‌ها گوتی: "ره‌نگه رێككه‌وتنه‌كه یه‌ك دانیشتنی دیكه‌ی مابێت و ته‌نها ئه‌وه ماوه كه كۆپییه‌ك له‌به‌ر ده‌ست سه‌ركردایه‌تی هه‌ردوولا دابێت".
ئه‌سه‌سه‌رد، ئاماژه‌ی به‌وه‌شكرد، خاڵه سه‌ره‌كییه‌كان یه‌كلابووه‌ته‌وه و ته‌نها ورده‌كارییه‌كی كه‌می ماوه.
بزووتنه‌وه‌ی گۆڕان، ساڵی 2009 له یه‌كێتیی نیشتمانی كوردستان جیابووه‌وه و بۆ یه‌كه‌مجار له 25ی ته‌ممووز/ جۆلیۆی 2009، به‌شدارییان له هه‌ڵبژاردنی په‌رله‌مانی هه‌رێمی كوردستاندا كرد و 25 كورسی په‌رله‌مانییان به‌ده‌ستهێنا.
له ئێستاشدا سه‌ركردایه‌تی ئه‌و دوو حزبه سه‌رقاڵی مۆركردنی رێككه‌وتنن له‌نێوان خۆیاندا، هه‌رچه‌نده تا ئێستا واده‌ی راگه‌یاندنی دیارنییه، به‌ڵام به به گوێره‌ی زانیارییه‌كان "ته‌نها ورده‌كارییه‌كان"ی ماوه.