پاپا: لە دوای سەردانم بۆ عێراق پرسیارێکم بۆ دروستبووە

K24- هەولێر:

پاپا فرانسیس، پاپای ڤاتیکان، لە دوای سەردانی عێراق و هەرێمی کوردستان، ئیدانەی ئەو کەسانە دەکات، کە چەک و تەقەمەنی بە تیرۆرستان دەفرۆشن.

بەگوێرەی هەواڵێکی ئاژانسی رۆیتەرز، پاپا رایگەیاندووە: "لە ماوەی سەردانەکەم، لە خۆم پرسی، کێ چەک دەفرۆشێتە تیرۆرستان''.

ئاماژەی بەوەشکردووە: "کێن ئەوان چەک دەفرۆشنە تیرۆرستان تاوەکو کۆمەڵکوژی پێ ئەنجام بدەن''.

پاپا دەڵێت: "ئەوە پرسیارێکە دەمەوێت وەڵامەکەی بزانم''.

نیگەرانی زیاتری خۆی دەربڕیووە و رایگەیاندووە: "ئەوانەی قاچاخچیەتی چەک دەکەن، دەبێت رۆژێک وەڵامی خودا بدەنەوە''.

پێنجی ئەم مانگە (ئادار)، پاپا فرانسیس سەردانی عێراقی کرد، دوو رۆژ دواتر هاتە هەرێمی کوردستان و لە هەولێر نوێژی قوداسی لە یاریگای فەرەنسو هەریری ئەنجامدا. لە درێژەی سەردانەکەی، سەردانی مووسڵی کرد و وێرانکاری ئەو شارەی لە نزیکەوە بینی.