هاوپەیمانی نێودەوڵەتیی بۆ کۆتایی هێنان بە پاشماوەکانی داعش کۆدەبێتەوە

K24- هەولێر:

وەزیرانی دەرەوەی وڵاتانی ئەندامی هاوپەیمانی نێودەوڵەتی دژی داعش کۆتایی ئەم مانگە بۆ زیادکردنی گوشارەکان و لەناوبردنی یەکجارەکی پاشماوەکانی داعش لە عێراق و سوریا کۆدەبنەوە.

وتەبێژی وەزارەتی دەرەوەی ئەمەریکا لە راگەیەندراوێکدا ئاماژەبەوە دەکات، ئەنتۆنی بلینکن وەزیری دەرەوە، لەگەڵ جێگری سەرۆک وەزیرانی بەلجیکا و وەزیری دەرەوەی بەلجیکا، سۆفی ویڵمز، سەرپەرشتی کۆبوونەوەی فراوانی وەزیرانی دەرەوەی وڵاتانی ئەندامی هاوپەیمانی نێودەوڵەتی دژی داعش دەکەن.

کۆبوونەوەکە 30 ئەم مانگە (ئادار) لەرێگەی ڤیدیۆ کۆنفرانسەوە بەرێوەدەچێت. ئامانجی لێی پێداچوونەوەیە بە هەوڵە بەردەوامەکان لە کەمپەینی دژی داعش بە مەبەستی لەناوبردنی یەکجارەکی هەرەشەکانی داعش.

ئەمەش لە کاتێکدایە، ئەمڕۆ، وەین مارۆتۆ، وتەبێژی هاوپەیمانی نێودەوڵەتی بۆ جەنگی دژ بە داعش، لە تویتێکدا رایگەیاند، لە مانگی مارس (ئادار)، هاوبەشەکانمان لە عێراق وسوریا، 50 ئۆپەراسیۆنیان لە دژی داعش ئەنجامداوە.

ئاماژەی بەوەشکردووە:  ''ئۆپەراسیۆنەکان رێگریانکردووە لە ئەنجامدانی 62 کردەوەی تیرۆرستی لەلایەن تیرۆستانەوە''.

تاوەکو ئێستا لە مانگی مارس، هاوبەشەکانمان لە عێراق وسوریا، 50 ئۆپەراسیۆنیان لە دژی داعش ئەنجامداوە کە ڕێگریکردووە لە ئەنجامدانی 62 کردەوەی تیرۆرستی لەلایەن تیرۆستانەوە. هاوکارمان بە بۆ لەناوبردنی داعش و زانیاری دەربارەیان بنێرە بۆ435 لە عێراق، و+9647512451273 لە سوریا. pic.twitter.com/rmH0qJjpME

— OIR Spokesman Col. Wayne Marotto (@OIRSpox) March 26, 2021