دێمبلی پێش ئه‌وه‌ی بگه‌ڕێته‌وه یاریكردن پێكانه‌كه‌ی سه‌ریهه‌ڵدایه‌وه
عوسمان دێمبلی پێش ئه‌وه‌ی بۆ یاریكردن بگه‌ڕێته‌وه، جارێكی دیكه پێكانه‌كه‌ی سه‌ریهه‌ڵداوه‌ته‌وه و بۆ یاریی داهاتووی بارسێلۆنا دوورده‌خرێته‌وه.
پێگه‌ی موندۆ دیپۆرتیڤۆی كه‌ته‌لۆنیا ئاشكرای كردووه كه له راهێنانه‌كانی ئه‌مڕۆ عوسمان دێمبلی هه‌ستی به ئازار كردووه.
به گوێره‌ی دوایین پشكنینه‌كان، پێكانێكی پێشووی عوسمان دێمبلی سه‌ریهه‌ڵداوه‌ته‌وه و ده‌ركه‌وتووه له ڕانی چه‌پی دا برینێكی هه‌یه و ناتوانێت به‌شداریی یاری داهاتوو له دژی سێلتا ڤیگۆ بكات.
سه‌رچاوه‌كه نووسیویه‌تی: دێمبلی له مێژه ئه‌م برینه له جه‌سته‌ی دا هه‌بووه و هه‌ستی پێنه‌كردووه، بۆیه پێشبینی ده‌كرێت گه‌ڕانه‌وه‌ی دێمبلی جارێكی دیكه دوابكه‌وێت.
له لایه‌كی دیكه‌یشه‌وه، به‌رگریكاری ئه‌مریكی دێست به‌هۆی پێكانه‌وه هاوشانی دێمبلی بۆ كاتێكی نادیار دوورده‌كه‌ونه‌وه و به‌شداریی یاریی داهاتووی رۆژی شه‌ممه به‌رامبه‌ر سێلتا ڤیگۆ ناكات، ئه‌مه‌ش له كاتێكدایه دێمبلی ئه‌م وه‌رزه ته‌نیا 25 خوله‌ك یاریی كردووه و ئه‌مڕۆ بۆ جاری دوازده‌یه‌م له بارسێلۆنا تووشی پێكان ده‌بێت.
