كۆمیسیۆنی هه‌ڵبژاردن: تانه‌ی 13 پارێزگا به ته‌واوه‌تی یه‌كلاكراونه‌ته‌وه
"1436 تانه به ته‌واوه‌تی پێداچوونه‌وه‌ی بۆ كراوه"
K24 - هه‌ولێر:
كۆمیسیۆنی هه‌ڵبژاردنی له راگه‌یه‌ندراوێكدا ئاشكرای كرد، تانه‌ی سه‌رجه‌م وێستگه‌كانی 13 پارێزگا ته‌واوبووه، كه ژماردنه‌وه‌ی ده‌نگه‌كان 100% هاوتای ئه‌نجامی ئه‌لیكترۆنی بووه.
له راگه‌یه‌ندراوه‌كه‌ی كۆمیسیۆنی هه‌ڵبژاردندا هاتووه، 1436 تانه به ته‌واوه‌تی پێداچوونه‌وه‌ی بۆ كراوه و سه‌رجه‌م وێستگه‌كانیان وردبینی بۆ كراوه و ده‌نگه‌كان به‌ده‌ست ژمێردراونه‌ته‌وه.
ئاماژه به‌وه‌ش كراوه، كه له 27ی تشرینی یه‌كه‌م تا 3ی تشرینی دووه‌م، تانه‌ی پارێزگاكانی نه‌ینه‌وا، بابل، میسان، دیاله، ره‌سافه و كه‌رخ له به‌غدا، هه‌ولێر، كه‌ركووك، كه‌ربه‌لا، موسه‌ننا، قادسیه، ئه‌نبار، زیقاڕ و به‌سره به‌ته‌واوه‌تی یه‌كلاكراونه‌ته‌وه.
كۆمیسیۆنی روونیكرده‌وه، وردبینییان بۆ 4 هه‌زار و 324 وێستگه‌ی ده‌نگدان كردووه، كه دوای ئه‌و هه‌نگاوه ئه‌نجامی كۆتایی له‌سه‌ر بڕیاری ده‌سته‌ی دادوه‌ری هه‌ڵبژاردن راده‌گه‌یه‌نێت.