سەرۆک بارزانی پێشوازی لە کونسوڵی هۆڵەندا لە هەولێر دەکات

K24 – هەولێر

سەرۆک مەسعود بارزانی، پێشوازی لە یاکو بریندز کونسوڵی هۆڵەندا لە هەولێر کرد و گفتوگۆیان لەبارەی ئاسایشی خۆراک و پێویستیی پاڵپشتیکردن لە کەرتی کشتوکاڵیان کرد.

لە دیدارەدا کە رۆژی سێشەممە (٢٠ـی کانوونی یەکەم) لە سەلاحەددین بەڕێوەچوو، پەیوەندییە دۆستانە و مێژووییەکانی نێوان هەرێمی کوردستان و هۆڵەندا خرایە بەر باس، بەتایبەت لە شەڕی دژی تیرۆر کە هۆڵەندا بەشێک بوو لە هەوڵی نیودەوڵەتی لە یارمەتیدانی پێشمەرگە بۆ شکاندنی داعش.

تەوەرێکی دیکەی ئەو دانیشتنە، ئاساییشی خۆراک و پێویستیی پاڵپشتیکردنی کەرتی کشتوکاڵ بوو بۆ ئەوەی ببێتە سەرچاوەیەکی گرنگ لە تەنیشت سەرچاوە پڕخێر و بەرەکاتەکانی دیکەی کوردستان.