وەزارەتی سەرچاوەکانی ئاوی عێراق: بەهۆی وڵاتانی دراوسێوە %70ی بەشە ئاومان لەدەستداوە
K24 - هەولێر:
گوتەبێژی وەزارەتی سەرچاوەکانی ئاوی عێراق رایگەیاند، بەهۆی سیاستەکانی وڵاتانی دراوسێوە، عێراق %70ی پشکی ئاوی خۆی لەدەستداوە.
لە لێدوانێکدا بۆ ئاژانسی هەواڵی عێراقی، خالد شمال، گوتەبێژی وەزارەتی سەرچاوەکانی ئاوی عێراق ئاشکرایکرد، دۆخی ئاو لە عێراق ناهەموارە و ناتوانن فشار لە رووبارەکان بکەن بەهۆی کەمی ئاوەوە.
گوتەبێژی وەزارەتی سەرچاوەکانی ئاوی عێراق باسی لەوەشکرد، وەزارەتەکەیان دوو ئامانجیان هەیە یەکەم دابینکردنی ئاوی خواردنەوە و ئامانجەکەی دیکەش پێدانی بەشە ئاوی پێویستە بە کشتوکاڵ.
خالد شمال ئەوەشیخستەڕوو، کە حکومەتی پێشوو هیچ رێککەوتنێکی لەگەڵ تورکیا و ئێران ئەنجامنەداوە کە ناچاریان بکات پابەندبن بە ناردنی بەشە ئاوی عێراق ئەوەش وایکردووە، %70ی ئەو بەشە ئاوەی پێویستە نەینێرن.