نۆ کەشتی جەنگی و 58 فڕۆکەی چینی لە دەوروبەری تایوان بیندراون
K24 - هەولێر:
وەزارەتی بەرگری تایوان رایگەیاند، نۆ کەشتی جەنگی و 58 فڕۆکەی چینی لە دەوروبەری دوورگەی تایوان بیندراون.
وەزارەتی بەرگری تایوان ئاشکرایکرد، لەرێگەی سیستەمی هەواڵگری هاوبەشەوە چاودێری جوڵە سەربازییەکانی چین دەکەن.
ئاماژەی بەوەشدا، لەنێو فڕۆکە چینییەکاندا، فڕۆکەی شەڕکەر و فڕۆکەی بۆمب-هاوێژ هەبووە.
لەلایکی دیکەوە، وەزارەتی دەرەوەی ئەمەریکا داوای لە چین کرد دان بەخۆیدا بگرێت و کاردانەوەی هەڵەی لەبەرامبەر تایوان نەبێت.
وەزارەتی دەرەوەی ئەمەریکا راشیگەیاند، هێشتا لەگەڵ چین لە پەیوەندیدان و داوایان لێدەکەن نەبنە هۆی تێکچوونی دۆخی ئەمنی رۆژهەڵاتی ئاسیا.
باسی لەوەشکرد، ئەمەریکا لەوە دڵنیایە کە توانای دابینکردنی ئارامی و ئاسایشی لە رۆژهەڵاتی ئاسیا هەیە و پابەندبن بەو بەڵێنانەی لەو بارەیەوە داویانە، لەنزیکیشەوە ئاگاداری مانۆڕە سەربازییەکانی چینن.
ئەمە لەکاتێکدایە، 8ی ئەم مانگە چین مانۆڕێکی سەربازی سێ رۆژەی لە گەروی تایوان دەستپێکرد و بەپێی گووتەی بەرپرسانی چینیش ئامانج لە مانۆڕەکە هۆشداریدانە بە سەربەخۆخوازە تایوانییەکان.
