رێبوار بابکەیی: یەکێتی دەیەوێت لە سلێمانی تەواو حوکومڕان و لە هەولێر و دهۆکیش پشکدار بێت
K24 - هەولێر:
ئەندامێکی پەرلەمانی کوردستان، جەختی لەوە کردەوە، لە پێناو بەرژەوەندی حزبی خۆیان، خەڵکی سلێمانی لەلایەن یەکێتییه‌وه کراونەتە بارمتە. هەروەها دەشڵێت: "یەکێتی دەیەوێت لە سلێمانی تەواو حوکومڕان و لە هەولێر و دهۆکیش پشکدار بێت".
رێبوار بابکەیی ئەندامی پەرلەمانی کوردستان، لە میانەی بەشداریکردنی لە ژووری هەواڵی کوردستان24، رایگەیاند، یەکێتی دەیەوێت دەسەڵاتی حکومەتی هەرێمی کوردستان نەگاتە سلێمانی و دەیەوێت داهاتی سلێمانی لە بەرژەوەندی خۆی بەکاربهێنێت.
هەروەها راشیگەیاند، یەکێتی دەیەوێت دۆسییه‌ی تیرۆرکردنی هاوکار جاف دابخرێت و خودی مەسرور بارزانی سەرۆکی حکومەتی هەرێمی کوردستان ئەوە قبوڵناکات کە سازش لەسەر رشتنی خوێنی هاووڵاتیەکی هەرێمەکەی بکات.
رێبوار بابکەیی، جەختی لەوەکردەوە: "ئێمە دەمانەوێت حکومەتی هەرێمی کوردستان دەسەڵاتداربێت، نامانەوێت حزب دەسەڵاتداربێت".
باسی لەوەشکرد: "نابێت زۆنی سیاسی و ئیداری بمێنێت، پێویستە یەک زۆن هەبێت، کە ناوی کوردستانە".
ئەو ئەندامه‌ی پەرلەمانی کوردستان، دووپاتیکردەوە، یەکێتی ئامادە نییە سازش بکات لەسەر چاکسازی و شەفافییه‌تی داهات لە بانکاکان و خاڵە سنوورییەکان.
رێبوار بابکەیی، روونیکردەوە، لە سنووری هەولێر و دهۆک حزب بە تەواوی پاڵپشتی حکومەتی هەرێمی کوردستانە، بە تایبەت لە پرسی حکومڕانی، شەفافیەت و چاکسازی.
بابکەیی، لە درێژەی قسەکانیدا رایگەیاند، خەڵکی سلێمانی لەلایەن یەکێتیەوە کراونەتە بارمەتە، لە پێناو بەرژەوەندی و دەسەڵاتییان.
گوتیشی: "سەرۆکی حکومەتی هەرێمی کوردستان داوا دەکات، سیسته‌مێکی کارگێری و دارایی هەبێت بۆ چاودێریکردنی کۆی گشتی داهات، بەڵام یەکێتی بەو شێوەیە قبوڵی نییە و دەیەوێت تاکلایەنانە سلێمانی بەڕێوەببات".
