مەسرور بارزانی لە کۆبوونەوەی لەگەڵ باڵیۆزی سوید: پێویستە هەڵبژاردن لە کاتی دیاریکراوی خۆی لەمساڵدا بکرێت
K24 - هەولێر:
مەسرور بارزانی، سەرۆکی حکومەتی هەرێمی کوردستان ئەمڕۆ لەگەڵ جێسیکا سڤاردسترۆم، باڵیۆزی سوید لە عێراق کۆبووەوە.
بە گوێرەی راگەیێندراوێکی حکومەتی هەرێمی کوردستان، هەردوولا گفتوگۆیان لەبارەی بارودۆخی گشتیی عێراق و برەودان بە پەیوەندییەکانی هەرێمی کوردستان و سوید کرد.
سەبارەت بە پەیوەندی حکومەتی هەرێمی کوردستان لەگەڵ حکومەتی فیدراڵ، مەسرور بارزانی و باڵیۆزی سوید لە کۆبوونەوەکەدا جەختیان لە گرنگیی و پێویستی رێزگرتن لە رێککەوتننەکانی نێوان هەردوولا و دابینکردنی ماف و شایستە دارایی و دەستوورییەکانی هەرێمی کوردستان کردەوە.
ئاماژە بەوەشدرا، لە تەوەرێکی دیکەدا، گفتوگۆیان لەبارەی دۆخی ناوخۆی هەرێمی کوردستان و گرنگیی ئەنجامدانی هەڵبژاردنی پەرلەمانی کوردستان كرد.
مەسرور بارزانی، سەرۆکی حکومەتی هەرێمی کوردستان لەو کۆبووەوەنەیدا دووپاتی کردەوە، پێویستە هەڵبژاردن لە کاتی دیاریکراوی خۆی لەمساڵدا بکرێت.
لە راگەیێندراوکەدا هاتووە: جێسیکا سڤاردسترۆم ئاماژەی بەوە دا کە سەڕەڕای گرفت و ئاستەنگەکان، بەڵام خۆشبەختانە پرۆسەی ئاوەدانکردنەوە و گەشەپێدانی هەرێمی کوردستان و هەولێر بەتایبەتی بەردەوامە.
هەروەها تەوەرێکی دیکەی کۆبووەنەوەکە تایبەت بوو بە باشترکردنی دۆخی ئافرەتانی کوردستان و گرنگی رەخساندنی دەرفەتی یەکسان لە بەردەم ئافرەتان لە کایە جۆراوجۆرەکاندا.