کتێبی "دیوەکەی تری دڵدار" بڵاو دەکرێتەوە

K24 - هەولێر
کتێبی "دیوەکەی تری دڵدار"، ناونیشانی نوێترین کتێبی نووسەرە و بڕیارە بەم نزیکانە ناوەندی رۆشنبیریی مەم و زین لە هەرێمی کوردستان و رۆژهەڵاتی کوردستان بڵاوی بکاتەوە و بە هاوبەشی لەگەڵ دەزگای 49 بۆکسیش لە وڵاتانی ئەوروپا بڵاو دەکرێتەوە.
بوخاری وشیار نووسەر و وەرگێر، بە کوردستان24ـی راگەیاند، ناوەڕۆکی کتێبی "دیوەکەی تری دڵدار" لێکۆڵینەوەیەکە سەبارەت بە شاعیری کورد یونس رەئوف (دڵدار)ە، کە یەکێکە لە شاعیرە دیارەکانی کورد و خاوەنی شیعری ئەی رەقیبە کە وەک سروودێکی نەتەوەیی کورد هاودەنگی هەموو کوردێکی بەدەستهێناوە.
نووسەر گوتی، "لێکۆڵینەوەکە جیاوازتر لە کتێبەکانی تر کە سەبارەت بە دڵدار نووسراون، تیشکی خستووەتە سەر لایەنە شاراوە و نەگوتراوەکانی پەیوەست بە دڵدار، نووسەر ویستوویەتی بەر لە هەموو شتێک دڵدارمان وەک ئەدیبێک پێ بناسێنێت، ئەویش لە رێگای گەڕانەوە بۆ ئەو قوتابخانە ئەدەبیانەی کە دڵدار پێیاندا تێپەڕیوە، هەروەها ئاماژەکردن بە وتارنووسی دڵدار و نووسینی یاداشت وەک ژانەرێکی پەراوێزخراو لە کۆمەڵگەی ئەوسای کوردیدا". ئەم کتێبە خۆی پاراستووە لەوەی دڵدار وەک سیاسی و کەسایەتییەکی حیزبی بناسێنێت، نووسەر دەیەوێت هەر لە سەرەتاوە ئێمە بەر پێناسەیەکی جیاوازتر بکەوین بۆ دڵدار و کەسایەتیەکی جیاوزتری دڵدار ببینین و ئاشنای دیوێکی تری دڵدار بین کە پڕە لە نهێنی.
لە بەشی "رەهەندە دەروونییەکانی دڵدار"دا نووسەر سەبارەت بە چەند باسێکی دەروونی دڵدار قسە دەکات و بۆ یەکەمین جار دەروون و کەسایەتی شاعیرێکی وەک دڵدار قسەی لەسەر دەکرێت و بەپێی قوتابخانە دەروون شیکارییەکان لێکدانەوە بۆ کاریگەری و لێکەوتەکانی پەیوەست بە دەروون و کەسایەتی دڵدار دەکرێت.
نووسەر سەبارەت بە ژیانە هەژاریەکەی دڵدار دەدوێت، وەک پاڵنەرێک بۆ ریالیزمیی بوونی دڵدار دیاری دەکات و تەنانەت پێماندەڵێت دڵدار بەشێوەیەک لەگەڵ هەژاری ژیاوە و پەروەردە بووە، کە کاریگەری بەسەر ئەدەبەکەشیدا هەبووە. هەروەها لە کتێبەکەدا سەبارەت بە زمان گرتن و بێدەنگییەکەی دڵدار قسە کراوە کە وایکردووە دڵدار کەسایەتییەکی تەنها و گۆشەگیری لێ دەربچێت و پەنا بۆ خۆدەربڕین لە رێگای شیعرەوە بەرێت.
هەروەها نووسەر پێمان دەڵێت، کە دڵدار کێشەی شوناسی هەبووە، ئەویش بەهۆی ئەو هەموو جێگۆڕکێیەی لە ژیانی ئەودا هەبووە کە وایکردووە خەیاڵی دڵدار بۆ جێگا هەمیشە خەیاڵیکی پچڕاوبێت. سەرباری ئەمانە نووسەر سەبارەت بە ژینگەی پەروەردەیی دڵدار دەدوێت و روونیدەکاتەوە کە دڵدار لە ژینگەیەکی مێینەییدا پەروەردەبووە و دایکپەروەر بووە، هەموو ئەمانە و کۆمەڵێک پرسی تری تایبەت بە دەروونی دڵدار بە وردی قسەی لەسەر کراوە و لێکدانەوە بۆ کەسایەتی پێگەیشتووی دڵدار کراوە.
دواتر لە بەشی (نهێنییە گەورەکەی دڵدار)دا نووسەر بەدوای گەورەترین نهێنی ژیانی دڵدار دەکەوێت و لە رێگای گەڕانەوە بۆ ئەدەب، شیعر و یاداشتەکانی دڵدار و سەرچاوەکانی تر، هەوڵدەدات ئەم نهێنیەی ژیانی دڵدارمان بۆ ئاشکرا بکات کە لە سەردەمی خوێندنی زانکۆ لە بەغدا سەرهەڵدەدات و بە مردنی دڵدار کۆتایی پێدێت.
ئەم کتێبە بەر لە هەموو شتێک وەک مرۆڤێک مامەڵە لەگەڵ دڵدار دەکات، بێ هیچ ئایدۆلۆژیا و لایەنگیریێک قسە لەسەر دڵدار دەکات، تەنانەت لە چەند جێگایەکدا رەخنەش لە دڵدار دەگرێت.
بوخاری وشیار نووسەر، خاوەنی شەش کتێبی چاپکراوە جگە لەم کتێبە.
ئا: لاڤین عومەر