سەرۆکوەزیران مەسرور بارزانی: بە هەموو شێوەیەک پشتیوانی لە جووتیارانی کوردستان و پاراستنی ئاسایشی خۆراک دەکەین

K24 - هەولێر:

سەرۆکوەزیرانی هەرێمی کوردستان رایدەگەیەنێت، "گرنگیدان بە کەرتی کشتکوکاڵ و کارکردن بۆ دابینکردنی ئاسایشی خۆراک، یەکێکە لە ئامانجە سەرەکییەکانی کابینەی نۆیەمی حکومەتی هەرێمی کوردستان".

دوانیوەڕۆی ئەمڕۆ یەکشەممە، 19-11-2023، مەسرور بارزانی، سەرۆکی حکومەتی هەرێمی کوردستان لە رێوڕەسمی کردنەوەی کارگەی "ئاردی دستار" لە دهۆک، رایگەیاند، "سوپاسی کۆمپانیای جێبەجێکار دەکەم. ئەم کارگەیە سەدان هەلی کاری بۆ گەنجان رەخساندووە".

سەرۆکوەزیران مەسرور بارزانی ئاماژەی بەوەش کرد، "گرنگیدان بە کەرتی کشتکوکاڵ و کارکردن بۆ دابینکردنی ئاسایشی خۆراک، یەکێکە لە ئامانجە سەرەکییەکانی کابینەی نۆیەمی حکومەتی هەرێمی کوردستان. بۆ ئەم مەبەستە لە ماوەی ساڵانی رابردوودا بەهەماهەنگی لەگەڵ کەرتی تایبەت کارمان کردووە بۆ جێبەجێکردنی چەندین پڕۆژەی گرنگ لە هەرێمی کوردستان لە بواری بەبازاڕکردنی گەنمی جووتیاران و کڕینەوەی گەنم و دانەوێڵەیان".

گوتیشی: "هەموو هەوڵێکمان دەخەینەگەڕ بۆ دابینکردنی ئاسایشی ئاو و خۆراک و پشتیوانیکردن لە بەرووبوومی ناوخۆ و بەرهەمی جووتیارانی هەرێمی کوردستان. جووتیارانمان دڵنیا دەکەینەوە حکومەتی هەرێمی کوردستان پاڵپشتییان دەکات و کار بۆ دۆزینەوەی بازاڕی ناوخۆ و دەرەوە بۆ بەرهەمەکانیان دەکات".

ئاماژەی بەوەش کرد، "دروستکردنی کارگەی لەم جۆرە هاوکارییەکی زۆری جووتیارانمان دەکات بۆ ئەوەی بەرهەمەکانیان بفرۆشرێن. هاوکات هاندانێکە بۆ ئەوان بۆ ئەوەی بەردەوامبن لەسەر کاری کشتوکاڵی و بەرهەمهێنان. بۆ ماوەی چەند ساڵێک جووتیارانمان لە دۆخێکی بێ ئومێدیدا بوون و، وەکو پێویست پاڵپشتییان لێ نەدەکرا، بەڵام دڵنیایان دەکەمەوە، خۆم زۆر لە خەمی بەرەوپێشبردنی کەرتی کشتوکاڵ و هاوکاری جووتیاران دام، هەرچیمان پێبکرێت بۆ هاوکاریکردنیان، درێخی ناکەین".

مەسرور بارزانی ئەوەشی خستەڕوو: "وەکو ئەوەی ئێوە ئاگادارن، لە ماوەی چەند ساڵی رابردوودا پڕۆسەی هەناردەکردنی بەرووبوومی ناوخۆیی جووتیارانمان بۆ بازاڕەکانی دەرەوە دەستیپێکردووە و بەردەوامیش دەبێت".

راشیگەیاند، "کوردستان هەر لە سەردەمی کۆنەوە دەڤەرێکی گرنگی کشتوکاڵی بووە و خاوەن زەوی بەرفراوان و دەوڵەمەندە. ئەگەر وەکو پێویست سوودی لێ وەربگیرێت، دەکرێت تا ئاستێکی باش ئاسایشی خۆراکی خۆمان دابین بکەین و ببینە سەبەتەیەکی خۆراک بۆ عێراق و جیهان".

وەکو ئەوەی مەسرور بارزانی باسی کرد، "حکومەتی هەرێمی کوردستان ئامادەیە هەموو ئاسانکارییەک بۆ کەرتی تایبەت پێشکەش بکات بۆ ئەوەی شان بە شانی کەرتی گشتی هەرێمی کوردستان بەرەو قۆناغێکی پێشکەوتوو ببەن. بۆیە داوا لە وەبەرهێنەرانی هەرێمی کوردستان دەکەم وەبەر‌هێنان لە کەرتی کشتوکاڵ و پیشەسازیدا بکەن بۆ ئەوەی ئابووری کوردستان زیاتر ببووژێتەوە و کەمتر پشت بە دەرەوە ببەستین بە مەبەستی دابینکردنی پێداویستییەکانی ناوخۆ".

دەقی گوتارەکەی سەرۆکی حکومەتی هەرێمی کوردستان:

بناڤێ خودێ مەزن و دلۆڤان جهێ خۆشحالیێ یە ئەڤرۆ لێرە ل کۆمەڵگەیا دومیز، ئەڤێ کارگەیا گرنگ ڤەدکەین. دەستخۆشیێ ل کومپانیا یا جی ب جیکار (کاڤین گرووپ) دکەم کو ئەڤ کارێ پێشکەفتی لێرە دروستکریە و دەرفەتێت کاری بۆ سەدان کەسان رەخساندی.

گرینگیدان ب کەرتێ چاندنێ و کارکرن بۆ دابینکرنا ئاسایشا خوارنێ، ئێک ژ ئارمانجێن سەرەکی یێت حکومەتێ بوویە. بۆ ڤێ مەرەمێش ل ساڵێت رابری، ب هەڤکاری ل گەل کەرتێ تایبەت، مە کار بۆ ئەنجامدانا چەندین پرۆژەیان ل باژێڕێت کوردستانێ کریە ل بیاڤێ ب بازاڕکرنا گەنمێ جوتیاران و کڕینەڤا دەخل و دانی ل جوتیارێت ناڤخۆ یێت کوردستانێ.

ئەم دێ هەمی بزاڤ و شیانێت خۆ دەینەکار ل پێناڤ دابینکرنا ئاسایشا ئاڤێ و خوارنێ و پشتیڤانیکرنا بەرووبوومێ ناڤخۆیی و بەرهەمێ جوتیارێت کوردستانێ. دڤێت جوتیارێت کوردستانێ د پشتراست بن کو حکومەت دێ هەمی پشتیڤانییەکێ بۆ کەت و کار دکەت داکو بازاڕێ ناڤخۆ و دەرڤە بۆ بەرهەمێت وان پەیدا بکەت.

دروستکرنا ڤان جۆره کارگەیاش، دێ هاروکاریەکا زۆرا جوتیارێت مە کەت داکو بەرهەمێت وان بێنە فرۆتن و هاندانەکە بۆ هندێ داکو د بەردەوام بن ل سەر کارێ چاندن و بەرهەمئینانێ. د دەمێ چەندین ساڵان دا، جوتیارێت مە د رەوشەکا بێ ئۆمێد دابوون کو وەکی پێویست پشتیڤانیا وان نەدهاتە کرن، بەلی وان دلنیا و پشتراست دکەم کو ئەز ب خۆ ب شەخسی گەلەک د خەما پێشڤەبرنا کەرتێ چاندنێ و هاروکاریکرنا جوتیارێت مە دا مە و هەر چیێ د شیانێت مە دا بیت ل هاروکاریکرنا وان تەخسیریێ ناکەین و هنگیش د ئاگادارن کو ل ساڵیت رابری، پرۆسەیا هنارتنا بەرووبوومێ جوتیارێت کوردستانێ بۆ بازاڕێت دەرڤە یێ دەست پێکری و دێ بەردەوامیش بیت.

کوردستان هەر ل سەردەمێ دێرین دا، دەڤەرەکا چاندنێ یا بناڤوبانگ بوویە و خودان ئەرد و زەڤیێت بەرفرەهـ و دەوڵەمەندە کو ئەگەر وەکو پێدڤی مفا لێ بێتە وەرگرتن، چێدبیت ئەم هەتا ئاستەکێ باش، ئاسایشا خوارنا خۆ دابین بکەین و ببینە سەبەتەیا خوارنێ بۆ عیراقێ و دەڤەرێش.

سوپاسیا کومپانیا جی ب جیکارا ڤی پرۆژەی دکەم . کەرتێ تایبەت دێ شێت رۆلەکێ گرنگ د پێشئێخستن و پێشڤەبرنا ئابووریا هەرێما کوردستانێ دا بگێڕیت و حکومەتا هەریمێش، یا ئامادەیە هەمی ئاسانکاریەکا پێدڤی پێشکەشی کەرتێ تایبەت بکەت بۆ هندێ مل ب ملێ کەرتێ گشتی، پێکڤە هەرێما کوردستانێ بەر ب قۆناغەکا پێشکەفتیتر ببەن.

لەوا ئەز داخازێ ل وەبەرهێنەرێت کوردستانێ دکەم کو وەبەرهێنانێ د کەرتێ چاندنێ و پێشەسازیێ دا بکەن داکو ئابووریا کوردستانێ پتر گەشە بکەت و مە کێمتر چاڤ ل دەرڤە بیت بۆ دابینکرنا پێداویستیێت خۆ.

د دەمێ ساڵێت رابریدا، کێمترین وەبەرهێنان د چاندنێ و پێشەسازیێ دا هاتیە کرن، لەوا بۆ پتر پێشڤەبرنا ئابووریا هەرێما کوردستانێ، پێدڤی یە گرنگیەکا پتر ب گەشەدان و پێشئێخستنا کەرتێ چاندنێ و پێشەسازیێ بدەین.

بەری چەندەکێ ئەز ل گەل وەبەرهێنەرێت کوردستانێ ل هەموو پارێزگەها رونشتم ل هەڤلێرێ و مە بەحسێ نێرینا حکومەتا هەرێمێ و داهاتیا ئابووریا کوردستانێ کر و مە ل نێزیکڤە گوهداریا تێبینیێت وا گلە وگازنده و داخازێت وا کرن دا بزانین چەوا حکومەت و کەرتێ تایبەت پێ چێت بن هاروکاریا ئێک بکەن داکو وەبەرهێنانێ ل ئاستێ هەرێما کوردستانێ زێدە بکەین و کەرتێت کشتوکاڵ و پیشەسازی و گەشتوگوزارێ ل کوردستانێ بەرەڤ پێشڤە ببەین.

تێبینیێت وا مە هەموو ب هەند وەرگرتن کو جهێ بایەخێ بوون ومە ئێخستە بەرنامێ کارێ خۆ دا بۆ هندێ کو کێمو کورتیێت هەی بێنە چارەسەر کردن.

بەس مەژ داخازەکا ژ وەبەرهێنەرێت کوردستانێ هەیە .ئەز جارەکا دی داخازێ ل سەرمایەدار و وەبەرهێنەرێت کوردستانێ دکەم، سەرمایێ خو ل کوردستانێ ب کاربینن . ئەو کەسێ کو لڤێرێ ل کوردستانێ زێدەتر وەبەرهێنانێ بکەت ، دلنيابن حكومەتیش دێ زێدەتر پشتیڤانیا وان کەت. پێکڤە ئەم هەموو دێ پێ چێت بین بەرەڤ ئاستەکێ باشتر ببەین وئابووریا کوردستانێ باشتر بکەین ودەرفەتێت کار بۆ خەڵکێ خۆ زێدەتر بکەین ، کو بێگومان ئەڤە دێ بیتە رێکەک بۆ هندێ رەوشا کوردستانێ وژیانا خەلکێ باشتر ببیت. هیڤیدارم ل جهات دیش ئەو بەرنامە و پرۆژێت حکومەتێ رەزامەندی ل سەر دای جی ب جی ببن.

ئەز سوپاسیا ئیدارا پارێزگەها دهۆکێ دکەم بۆ پشتیڤانیا وان وهاروکاری و هەماهەنگیا وان ل گەل کەرتێ تایبەت بۆ ئەو پرۆژێت حکومەتێ بۆ وان دەستنیشان کری و وان لڤێرێ جی ب جی کری .هیڤیدارم ل هەموو ئیدارە و پارێزگەهێت کوردستانێ ، داهاتێت پارێزگەها دیسا بۆ خزمەتا خەلکێ پارێزگەهێ و کوردستانێ بهێتە ب کار ئینان.

جارەکا دی دەستخوەشیێت ل هنگۆ دکەم و هیڤیدارم هەموو گاڤێ سەرکەفتی بن و کوردستانا مەش ڕۆژ ب ڕۆژ ئاڤەدانتر ببیت.