پڕۆژەی "نەفەس" بۆ چاندنی 47 هەزار نەمام لە کەسنەزان راگەیەندرا
K24 - هەولێر
بە هەماهەنگی لەگەڵ تورکیا و کونسوڵخانەی ئەو وڵاتە لە هەرێمی کوردستان؛ پڕۆژەیەک بۆ چاندنی نزیکەی 47 هەزار نەمام لە فەرمانگەی دارستانی کەسنەزان راگەیەندرا.
بەیانیی ئەمڕۆ پێنجشەممە، 23-11-2023، لە رێوڕەسمێکدا پڕۆژەی "نەفەس" بۆ چاندنی 47 هەزار نەمام لە فەرمانگەی دارستانی کەسنەزان، لە سنووری پارێزگای هەولێر دەستیپێکرد. ئەم پڕۆژەیە لە چوارچێوەی گرنگیدان بە سەوزکردنی ژینگە و رووبەڕووبوونەوەی گۆرانکارییەکانی کەشوهەوایە لە هەرێمی کوردستان.
لەسەر داواکاری وەزارەتی کشتوکاڵ و سەرچاوەکانی ئاوی هەرێمی کوردستان؛ سەرجەم نەمامەکان لەلایەن وەزارەتی کشتوکاڵی تورکیا و کونسوڵی گشتی کۆماری تورکیا، بۆ هەماهەنگی و پاڵپشتی سێکتەری کشتوکاڵی و ژینگەی هەرێمی کوردستان دابینکراون.
رێوڕەسمەکە بە ئامادەبوونی بێگەرد تاڵەبانی، وەزیری کشتوکاڵ و سەرچاوەکانی ئاوی حکومەتی هەرێمی کوردستان؛ ئومێد خۆشناو، پارێزگاری هەولێر؛ عەبدولرەحمان سدیق، سەرۆکی دەستەی پاراستن و چاککردنی ژینگە؛ بەیان سامی عەبدولرەحمان، راوێژکاری سەرۆکوەزیران بۆ پرسی گۆرانکارییەکانی کەش و هەوا؛ مەهدی ئەکەر، وەزیری پێشووی کشتوکاڵی تورکیا و و مەولوود یاقوت، کونسوڵی گشتی ئەو وڵاتە لە هەرێمی کوردستان بەڕێوەچوو.
بێگەرد تاڵەبانی لە کۆنفرانسێکی رۆژنامەوانیدا سوپاسی وەزیری پێشووی کشتوکاڵی تورکیا و کونسوڵخانەی ئەو وڵاتەی لە هەولێر کرد و رایگەیاند، "لە ئاییندەدا هەماهەنگی زیاترمان لەگەڵ وەزارەتی دارستان و کشتوکاڵی تورکیا دەبێت بۆ زیادکردنی رووبەڕی سەوزایی لە هەرێمی کوردستان".
لەلایەن خۆیەوە مەهدی ئەکەر، وەزیری پێشووی کشتوکاڵی تورکیا لە رێوڕەسمی راگەیاندنی پڕۆژەکە گوتی: "هەسارەی زەوی رۆژ بە رۆژ گەرمتر دەبێت و کەشوهەواش گۆڕانکاریی بەسەردا دێت؛ ئەمەش مەترسییەکی جیددییە لەسەر ژیانی مرۆڤ لەسەر ئەم هەسارەیە."
وەک ئەوەی مەهدی ئەکەر ئاماژەی پێ دا، "بوونی دارستان و زیادکردنی رووبەڕووی سەوزایی، زۆر گرنگە بۆ پاککردنەوەی هەوا و دابەزینی پلەکانی گەرما. زیاتر لە 47 هەزار نەمام دەچێنین و دڵنیاین ئەو ناوچەیەی نەمامەکانی لێ دەچێنین، لە داهاتوودا دەبێتە دارستان".
هاوکات ئومێد خۆشناو، پارێزگاری هەولێر خۆشحاڵی خۆی بە راگەیاندنی پڕۆژەی "نەفەس" دەربڕی و جەختی کردەوە، گۆڕانکارییەکانی کەشوهەوا مەترسیی لەسەر هەرێمی کوردستان، دراوسێکانی و هەموو وڵاتانی ناوچەکە هەیە، بۆیە پێویستە هەموو لایەک پێکەوە کاربکەن بۆ رووبەڕووبوونەوەی مەترسییەکانی.
پاراستنی ژینگە و زیادکردنی سەوزایی بەشێکی گرنگە لە پلانی کابینەی نۆیەمی حکومەتی هەرێمی کوردستان، لەو چوارچێوەیەدا ساڵانە هەڵمەتی نەمام چاندن لە زۆربەی شار و شارۆچکەکانی کوردستان بەڕێوەدەچێت.
بەگوێرەی داتاکانی دەستەی پاراستن و چاکردنی ژینگە، لە سەرەتای دەستبەکاربوونی کابینەی نۆیەمەوە تا مانگی تەممووزی ئەمساڵ؛ رێژەی سەوزایی لە هەرێمی کوردستان بۆ سەدا 18 زیادیکردووە.
