بارزانی پشتیوانی لە داخوازی پێشمەرگە دێرینەكان دەكات
بە مەبەستی رێكخستنی مووچە و داواكارییەكانیان باس لە پێكهاتنی لیژنەیەكی تایبەت بۆ بەدواداچوون و جێبەجێكردنی بڕیارەكان كرا
K24 – ھەولێر
مەسعوود بارزانی سەرۆكی ھەرێمی كوردستان پشتیوانی خۆی بۆ داخوازی پێشمەرگە دێرینەكان راگەیاند.
ئەمڕۆ لە سەلاحەدین مەسعوود بارزانی سەرۆكی هەرێمی كوردستان لەگەڵ شاندی هاوبەشی دەزگای باڵای ئەیلوول و كۆمەڵەی پێشمەرگە دێرینەكان كۆبووەوە كە لە بەرپرس و ئەندامانی هەر دوو دەزگاكە پێكھاتبوون.
لە كۆبوونەوەكەدا بەرپرس و ئەندامانی دەزگای باڵای ئەیلوول و كۆمەڵەی پێشمەرگە دێرینەكان باسیان لە كێشە و گرفتەكان و باری خەراپی ژیانی پێشمەرگە دێرینەكان كرد و داوایان كرد سەرۆك بارزانی خەمیان لێ بخوات و حسابێكی تایبەت و دادپەروەرانە بۆ خەبات و ماندووبوونی پێشمەرگە دێرینەكان بكرێت و باری گوزەرانیان باشتر بكرێت.
هەر لە كۆبوونەوەكەدا بە مەبەستی ڕێكخستنی مووچە و داواكارییەكانیان باس لە پێكهاتنی لیژنەیەكی تایبەت بۆ بەدواداچوون و جێبەجێكردنی بڕیارەكان كرا.
لە بەشێكی دیكەی كۆبوونەوەكەدا شاندی هاوبەشی دەزگای باڵای ئەیلوول و كۆمەڵەی پێشمەرگە دێرینەكان پاڵپشتیی خۆیان بۆ دەستپێشخەرییەكەی بارزانی و چارەسەركردنی قەیرانی سیاسی و ئاساییكردنەوەی بارودۆخی سیاسیی هەرێم ڕاگەیاند.
لە بەرانبەردا سەرۆكی ھەرێمی كوردستان سوپاس و پێزانینی خۆی بۆ خەبات و ماندووبوون و قوربانیدانی پێشمەرگە دێرینەكان دەربڕی و پشتیوانیی خۆیشی بۆ داواكاری و مافەكانیان ڕاگەیاند. هەروەها باسی لە بارودۆخی سیاسیی هەرێم و چارەكردنی قەیرانی سیاسی و هەروەها ئاییندەی كوردستان وپەیوەندییەكانی لەگەڵ عێراقدا كرد و ڕۆشناییشی خستە هەنگاوەكان بۆ سەربەخۆیی و پیادەكردنی مافی دیاریكردنی چارەنووسی گەلی كوردستان.