زیاد لە ملیۆنێک هاووڵاتی غەززە ئاوارەی رەفەح بوون

24 – هەولێر:

نەتەوە یەکگرتووەکان بڵاوی کردۆتەوە، زیاد لە یەک ملیۆن هاووڵاتیی لە کەرتی غەززە لە رۆژی 7 ی ئۆکتۆبەری ساڵی رابردووەوە، ئاوارەی رەفەح بوون.

ئەمڕۆ پێنجشەممە (4ی کانوونی یەکەمی 2024)، نەتەوە یەکگرتووەکان لە راپۆرتی مرۆیی خۆیدا ئاماژە بەوە دەکات، ئێستا پارێزگای رەفەح بۆتە پەناگەیەک بۆ ئاوارە و پەنابەرانی لە جەنگی نێوان حەماس و ئیسرائیل هەڵدێن، بەشێوەیەک  زیاتر لە یەک ملیۆن کەس لە ناوچەیەکی زۆر قەرەباڵغ، پاش ئەوەی هێرشەکانی ئیسرائیل بۆ سەر خان یۆنس و دێر ئەلبلح چرتر بوونەتەوە و، سوپای ئیسرائیلیش فەرمانی کردووە دانیشتوانەکەی، ماڵەکانیان بەجێبێڵن.

بەپێی ئاژانسی ئۆنروا بۆ یارمەتیدان و کارپێکردنی ئاوارە و پەنابەران، لە ماوەی کۆتایی ساڵی 2023، ژمارەی ئاوارەکانی کەرتی غەززە تا ئێستا گەیشتۆتە نزیکەی یەک ملیۆن و 900 هەزار کەس، کە دەکاتە نزیکەی 85٪ ی دانیشتووانی تەواوی کەرتی کەرتی غەززە، لەگەڵ ئەوانەی چەندین جارە ئاوارە دەبن لەپیناو دۆزینەوەی شوێنێکی ئارام و سەلامەت بۆ ژیان.

بەپێی زانیارییەکان، نزیکەی یەک ملیۆن و 400 هەزار ئاوارە لە 130 دەزگای ئۆنروا لە پینج پارێزگا دەژین.

ئاژانسی نەتەوە یەکگرتووەکان بۆ هاوکاریی مافی مرۆڤ دووپاتیکردەوە، هیچ پەناگەیەکی ئارام لە کەرتی غەززەدا نەماوەتەوە، لە راگەیاندراوێکیاندا دەڵێن: ناوانین قسە لەسەر هیچ شوێنێکی سەلامەت بکەین، خەڵک لەسەر شەقامەکان دەخەون، هەندێکیشیان ناتوانن گوێڕایەڵی فەرمانی ئیسرائیل بکەن بۆ چۆڵکردن.