داعش بیرە نەوتێكی تەقاندەوە
K24 - ھەولێر
داعش لە رێگەی بۆمبی چێنراو بیرەنەوتێكی لە یەكێك لە كێڵگە نەوتییەكانی كەركووكی تەقاندەوە، بە گوێرەی زانیارییە سەرەتاییەكان بیرە نەوتەكە گڕی گرتووە و تا ئێستا كۆنتڕۆڵ نەكراوە.
بەپێی زانیارییەكانی كوردستان24 چەكدارانی داعش لە رێگەی سێ بۆمبی چێنراو یەكێك لە بیرەكانی كێڵگەی نەوتی ئاڤانەی تەقاندوەتەوە، دوای تەقاندنەوەی بیرە نەوتیەكە گڕی گرتووە و تا ئێستا كۆنتڕۆڵ نەكراوە.
ئەمە لە كاتێكدایە چەند رۆژێك لەمەوبەر چەكدارانی داعش بە نارنجۆك ھێرشیان كردەسەر كێڵگەی نەوتی بای حەسەن و بیرە نەوتێكیان سووتاند.
بەگوتەی فەرماندە سەربازییەكان دوای ئەوەی داعش لە ھێرشەكانی بۆسەر سەنگەرەكانی پێشمەرگە شكستی زۆری بەركەوت و سەركەوتوو نەبوو، لە ئێستادا ھەوڵدەدات ھێرش بكاتەسەر كێڵگە نەوتییەكان.