پەروێز رەحیم: عێراق بەبێ هاوپەیمانان ناتوانێت خۆی لە هەڕەشەی تیرۆر بپارێزێت
K24 – هەولێر:
شارەزاییەکی ئاسایشی نێودەوڵەتی، رایدەگەیەنێت، بە کشانەوەی هێزەکانی ئەمەریکا و هاوپەیمانان لە عێراق، ئەوا ئەو وڵاتە تووشی زیانێکی گەورەی ئابووری دەبێت. گوتیشی: عێراق بەبێ ئەمەریکا و هاوپەیمانان ناتوانێت خۆی لە هەڕەشەی تیرۆر بپارێزێت.
پەروێز رەحیم، شارەزای ئاسایشی نێودەوڵەتی بە ژووری هەواڵی کوردستان24ـی راگەیاند، فشاری دەرکردنی هێزەکانی ئەمەریکا و هاوپەیمانان لە عێراق بڕیارێکی عێراقی نییە بەڵکو بڕیارێکی ئێرانییە.
ئەو شارەزایەی ئاسایشی نێودەوڵەتی ئاماژەی بەوەدا، عێراق پێویستی بە مانەوەی هێزەکانی هاوپەیمانانە، چونکە ئەو وڵاتە ئەو توانایەی نییە لەبەرامبەر هەڕشەکان و هێرشی گرووپە تیرۆرستییەکان خۆی بپارێزێت.
پەروێز رەحیم، راشیگەیاند، گرووپە چەکدارەکانی عێراق تەنانەت لە دەرەوەی سنووری ئەو وڵاتە چالاکی سەربازی ئەنجامدەدەن و لەژێر کۆنتڕۆڵی حکومەت نین، بەڵام کاتێک کە سەرکردەیەکیان یان کەسێکیان لەلایەن ئەمەریکاوە بە ئامانج دەگیرێت ئەو کاتە داواکاری بەرز دەکەنەوە کە ئەوانە هێزی فەرمین.
ئەو شارەزایەی ئاسایشی نێودەوڵەتی دەڵێت: ئەگەر ئەمەریکا لە عێراق بکشێتەوە، ئەوا ئەو وڵاتە تووشی زیانێکی گەورەی ئابووری دەبێت، هەروەها لە رووی ئاسایشەوەش دەبێتە دەوڵەتی میلیشیاکان.
پەروێز رەحیم، گوتی: بڕیاری کشانەوەی ئەمەریکا لە عێراق ئاسان و خێرا نابێت، مەترسییەکان لە عێراق تەنیا داعش نین بەڵکو وڵاتی دراوسێش بە مووشەک هێرشی سەر ئەو وڵاتە دەکات.
