گەڕێكی نوێی دانووستانەکانی ئیسرائیل و حەماس دەست پێدەکاتەوە

ئاوارەبوونی دانیشتوانی غەززە بەهۆی شەڕەوە
ئاوارەبوونی دانیشتوانی غەززە بەهۆی شەڕەوە

K24 – هەولێر

بنیامین ناتانیاهۆ سەرۆکوەزیرانی ئیسرائیل ڕازی بووە بەوەی لە ڕێگەی نێوەندگیرەکانەوە، گەڕێکی نوێی دانووستانەکانی ئاگربەست لەگەڵ بزووتنەوەی حەماس دەست پێبکاتەوە بۆ ئەوەی ئاڵوگۆڕی ڕفێندراوان و زیندانییان بکەن.

بە گوێرەی ئەو ڕاگەیەندراوەی نووسینگەی سەرۆکوەزیرانی ئیسرائیل بڵاویکردووەتەوە، بۆ دەست پێکردنەوەی دانووستانەکانی ئاگربەست و هەوڵەکانی ئازادکردنی بارمتەکان، ناتانیاهۆ لەگەڵ دەیڤید بارنیا، سەرۆکی دەزگای هەواڵگریی مۆساد و ڕۆنیین بار، بەڕێوەبەری دەزگای ئاسایشی گشتیی ئیسرائیل (شاباک) گفتوگۆی کردووە و ڕازی بوونی خۆیی بۆ گەڕێکی دیکەی دانووستانەکان دەربڕیوە کە بڕیارە لە چەند ڕۆژی داهاتوو دانووستانەکان لە دەوحە و قاهیرە دەست پێ بکەنەوە.

لەلایەن بزووتنەوەی حەماسەوە، مەحموود مرداوی، سەرکردە لەو بزووتنەوەیە رایگەیاندووە، پێنج مەرجی سەرەکیان هەیە بۆ دەستپێکردنەوەی دانووستانەکان لەگەڵ ئیسرائیل، کە بنەمای هەر ڕێککەوتنێکە بۆ ئاڵوگۆڕی بارمتە و زیندانییەکان.

بە گوتەی مەرداوی مەرجەکانیش بریتین لە :

- ڕاگرتنی شەڕ.

- رێگەدان بە گەڕانەوەی ئاوارەکان بەبێ مەرج.

- کشانەوەی سوپای ئیسرائیل لە غەززە.

- ڕێگەدان بە گەیشینی دەرمان و هاوکارییە مرۆییەکان.

- دووبارە ئاوەدانکردنەوەی غەززە

هەروەها شەوی ڕابردوو لە عومانی پایتەختی ئوردن  هەزاران لە دانیشتوانی ئەو شارە لە بەردەم باڵیۆزخانەی ئیسرائیل گردبوونەوە و ئیدانەی بەردەوامیی شەڕ و داوای ڕاگرتنی شەڕی غەززەیان کرد.

ئەمەش لە کاتێکدایە ئەنجوومەنی ئاسایشی نێودەوڵەوتی 25ی ئەم مانگە پرۆژە بڕیاری ئاگربەستی دەستبەجێی لە کەرتی غەززە پەسەند کرد.